Ka MLA wa da chah beh (Suspended) yong ka Congress, ka Dr. M Ampareen Lyngdoh da pynksan ko yei lai yabi lang ki 5 ngut ki MLA waka sorkar Meghalaya Democratic Alliance (MDA), hanla da mih boon ki chah pynbaad i chah klam. Da ong ko wa ka sorkar MDA da jooh ap ko ya ki MLA ka Congress heipor wa em ki ha ka Liang Pyrchah.
Hawa yatoh wa ka aiñ yakhle, ka Ampareen da ong ko wa ha i por wa wanrah nyngkong ya ka Bill, ka sorkar da chim ko yei e yumut yong ki MLA wa da wanrah hapoh ka yung dorbar chna aiñ.
Da ong ko leh wa hawa yatoh wa i pynbha pynbiang hadien i chah ktah ka khlam, ka sorkar MDA da chim ko ye yei e yumut ki MLA.
Ka Ampareen da ong ko leh wa kani ka sorkar da pyrchang ko leh wow leh iyi iyi neibynta wow pynlait biang ka sorkar wow yoh u khayi ya u mooyong wei wot i ku dor ki mar ki mata, kani ka sorkar da chim ko ya ki laad ki luti.
Da ong ko leh wa ka da pyrchah ko yaka sorkar MDA ha ki snem wa da dep, tangwa ki kattu katni ki bynta kiwa ka sorkar da pynyoo ko yei ye wow krehkaam daw man ko iwa yarap ya ka jylla wei iwa da pynman ya ki 5 ngut wow pyrkhat wow man noh ki dkhot ha ka sorkar wow e buit lang ya ka sorkar.
Hawa yatoh wa i pynbaad wa i kreh tangdep ya ka Inter State Bus Terminus (ISBT), da ong ko wa ym tip ko heiyatoh wa i pynkreh ya katai ka thaw, tangwa da ong ko wa lada em i kreh tangdep, kam kiwa emlang ha ka sorkar emkaam wow yaklam wei daw pyrchang leh wow pynbait yeiwa wit wa da em, wei lada em itæ i ood, ka sorkar emkaam ko wow pynbait.
