Hadien wa ki dkhot yong ka EJNC-Sumer Circle da sakhi ki yei jæd i piah ka yingkieñ Rimanar kawa em hajan ka chnong Samasi, Elaka Sumer neiliang kiwa yahkhmat yong ka ynne ka sngi hapoh i yahkhmat u President, u Sakilan Chyrmang, u General Secretary, u Seibor Tangliang ryngkat i synranlang u Kynmo Chyrmang, Waheh Chnong Samasi dei sñiawkhia da hiar ki wow pynchna hi da ki hi ya itai i jæd katai ka yingkieñ Rimanar.
Ka seiñ da ong ko wa i lai ki kari wa kit palatpood na kani ka yingkieñ Rimanar da booh ko hei maa wa khroo ya kani ka yingkieñ lada kini ki kari wa kit palat yaka 9 MT u pteiñ ki wow lai lyngba kani ka yingkieñ, daw poi i por wa kani ka yingkieñ daw dooh noh ya ka wei daw man iwa dooh wa khroo ya ki paidbah wa chong chnong yong kani ka thaaiñ neibhah wa kani ka yingkieñ toh ka budloom yong ka Elaka Sumer hi waroh kawi.
Kamtæ hajrong kani ka yurim, ka EJNC-SC da maham ko deiwa khang pyrchah yaki kari wa kit palat ya 9 MT wow lai lyngba kani ka yingkieñ Rimanar wei lada ka seiñ dang chem ko neini chakhmat wa ki kari wa kit palat pood u nang lai ki lyngba kani ka yingkieñ, neiliang ka EJNC-SC daw pynchitom ko ya ki deiwa eh.
Heijooh i por ka seiñ kyntu ko yaka chnat PWD yong ka EJHD wow chimkhia noh smat wow pynchna ya kani ka yingkieñ.
