Ka National Health Authority (NHA) da pynman ko ya i yachemlang wa ki jylla ka thaaiñ mihsngi wow bichaar yei pynkrehkaam ya ki Scheme ka sorkar pyrdi, wa kynthup ya ka Ayushman Bharat Pradhan Mantri Jan Arogya Yojana (ABPMJAY) deilang waka Ayushman Bharat Degital Mission (ABDM).
Hawa yaklam wa kiwa pathai khubor ha Shillong, u Dr. R.S. Sharma, uwa man u CEO ka National Health Authority (NHA) da ong u wa ka Ayushman Bharat Pradhan Mantri Jan Arogya Yojana toh ka Scheme wow e sumaar mynkna ya kamwa 40% kiwa chong chnong ka ri India, wei da pyntip u wa waroh 8 tylli ki jylla ka thaaiñ da leh bha ki wow pynkrehkaam ya kani ka Scheme.
U Dr. Sharma da yaroh u leh wa yei em ki Village Health Council wa da booh da ka sorkar jylla wow yarap jhan ya kiwa kjut wa chitom wei da ong u wa kiwi ki jylla daw bood ki yeini i rukom krehkaam wa wanrah da ka jylla Meghalaya.
Heiyatoh won waka Ayushman Bharat Digital Mission, u CEO ka NHA da ong u wa kani ka rukom krehkaam da pynsuk bha ko ya ki paidbah khamtam ha kani ka juk waroh tip ki ya ka stat Digital, nadooh wow yaklam wa ki Doctor wei wow yoh ya ki dawai khlem pynchitom wow lai da idæ.
Neiliang u Dr. Sharma da ong u wa i eh i khoo wa chem wow pynkrehkaam ya ki Scheme toh du ha ki kattu katni ki bynta wa em cha palatsor kiwa duna ki laad pynyabi (Connectivity), khamtam lada emkaam yei yarap wa rap jhan, wei da kular u wow lai yaklam cha Delhi wa ka chnat Telecom wei kamjooh wa ka Telecom Regulatory Authority of India (TRAI) wow pyntikna wa ki paidbah ha palatsor u ye ki u pynyabi cha ki rukom krehkaam lyngba ki stat Digital.
