Uwa yahkhmat ka Liang Pyrchah haka jylla, u Dr. Mukul Sangma da ong u wa man iwa emkaam wow em da ka Independent Quality Monitoring Team (IQMT) neibynta wow ye u pait ya i rukom pynkreh nadooh wa sdang yow lait u em itæ i pynsepai nadooh i por lane ka poisa hawa pynkreh ya kiwon kiwon ki kaam.
U Dr. Mukul da ong u wa i oor ka khlieh tnoom ka Yung Dorbar Chna Aiñ wa thymme ha Mawdiangdiang da pynkyrngiat i wei toh u thooh kammon wa da jia ini, na kiyi ki daw, neibhah kani ka yung toh kawa da chna neibynta ka jylla wei kawa toh u yieñ yanom, tangwa iwa sñiawsih toh wa da jia noh kamni kamwa da sakhi.
U Dr. Mukul uwa man leh u MLA ka AITC da ong u wa ha ka yalang yong ka High Power Committee (HPC) nadooh wa sdang wa mynjur yei tyrwa wa e laad ya ka Company kawa booh dor khian dooh, hajrong ini leh da dep wow e yumut wa toh u em ka Independent Quality Monitoring Team khnang wa ka kaam u man ko kawa lai bait lai ryntih yow lait leh nei em kiwa leh ya ki kaam wym hok.
Chooh chooh da ong u wa kopsar hawa yatoh wa i chna ya kani ka yung dorbar thymme, ym em booh ya ki kyndon ka CBC, neibhah katkam ini, ki sorkar jylla daw ye ki wow pyntikna wa ym em iwon iwon wa leh ki kaam wa thok.
Da ong u wa hajrong i jia i oor noh ka khlieh tnoom, da toh u takit da ki bru wa man laitlooid wei toh u thooh bniah yow pynsakhiat wa ini i oor toh neidaw wa bakla ha ka ‘Design’ lane ha i rukom pynkreh ya kani ka yung, neibhah ya katni ym ye wow pynkut wa toh na kani katai ka daw, tangwa emkaam wow pynsakhiat hawa wow poi cha wakut.
