Ka Dorbar Chnong Umkiang, da pynsñiaw ko yei sñiawkhia wa joor hajrong i wym biang i rukom krehkaam ka Meghalaya Rural Bank, Umkiang Branch neidaw wym biang Internet man-i-por.
Ini da booh ko hei eh ya ki paidbah wa pynemkaam ya kini ki Bank kiwa ym du naka chnong Umkiang tangwa wot nadooh na Ratacherra, Dona Skur wa chadooh Huroi, Lejri, Borsara, Kuliang wa Pyrtakuna kiwa da hap wow pynlut sngi wei por yow lai emkaam ha katai ka Bank tangwa manda wan ki da man iwa sepai manda ym krehkaam ka Internet ha kani ka Bank.
Hawa ya nujor wa kiwi won ki Bank kiwa em hapoh ka chnong Umkiang, ki leh da jooh dooh Internet ki tangwa da ye ki wow pynbiang du hapoh chi sngi lane ar sngi. Tangwa kani ka MRB Umkiang won barabor da jooh pynjynjar ko ya ki paidbah dei wym hoi Internet da ki tayaw.
Ka Dorbar Chnong da ong ko wa i yong sakhiat, u Branch Manager wa kiwa pait ya kani ka Bank toh u kular ki wow pynbiang ya ka Internet tangwa da ki bnai ym ye ki wow leh kamwa da kular ki ha kiwa yahkhmat ka chnong.
Kamtæ ka Dorbar Chnong Umkiang dei wym yohsa de ko da maham ko wow khang tala noh ya kani ka Bank hapoh chitayaw lane artayaw lada kani ka Bank ym ye ko wow pynbiang pura ya ka Internet neibynta i bha i miat yong kiwi ki chnong leh.
