U Montri ka chnat Sports & Youth Affairs, u Banteidor Lyngdoh ynne da kitbok kitrwiang u kiwa yalehke ka Meghalaya kiwa daw chimbynta ha ka Khelo India Youth Games kawa daw pynman ha Panchkula, Haryana nadooh ka 3 hadooh ka 14 tarik u Naiynru, 2022.
Ya ka yalang da pynman da ka Directorate of Sports & Youth Affairs ka sorkar Meghalaya ha madan ka SAI wa em ha NEHU Campus, Shillong.
Hawa e yei klam, u Banteidor Lyngdoh da ong u wa kiwa yalehke wa mihkhmat ya ka jylla da emkaam wow man ki kiwa ryntih, kiwa emakor emburom, kiwa rai kut wow wanrah burom yaka jylla.
Da khana u leh wa ka sorkar jylla da pynkrehkaam ko yaka Sports Policy hapoh ka Meghalaya iwa daw yoh myntoi bha ki khynroo khyllood kiwa em sap deiwa pynsñiaw leh yei sñiawngooh ya ki Sports Association, ki Coach wa kiwi ki wakreh yow saiñdur ya kiwa yalehke ha kani ka rynsan wa heh ka ri.
U Montri da e u leh ya ki kyntien pynchlur ya kiwa yalehke ka Meghalaya deiwa ban joor yei emkaam i mynsien ya krehlang wa i mynsien yaleh yow poi cha ka thong.
Kiwa yalehke ka Meghalaya da em ki 32 ngut wa 10 ngut ki Official wei daw chimbynta ha ki yalehke Football, Athletics, Judo, Swimming wa Boxing. Da yahkhmat ya kini da ka Darlene M Khonglam kam ka Chef De Mission.
