Ha ka United Nation World Summit yong ka Information Society Forum 2022, iwa da sdang da ka sorkar Meghalaya wa da leh da ka Meghalaya Enterprise Architecture da yoh ko yei naam Best Project Award kam kawa jop hapoh ka kyrdan “The role of governments in the promotion of ICTs for development”.
U Houlin Zhao, Secretary General ka ITU da e u ya kani ka khusnaam cha u Conrad K Sangma, Montri Rangbah ka jylla ha ka yalang saam khusnaam kawa tip kam ka WSIS Forum Prizes 2022, wa da pynman ha Geneva, Switzerland ynne ka sngi.
Waroh da em 360 tylli ki Project wa da chah bichaar na kiwa boon ki ri ha kiwa bichaar ka UN. Hadien ini da jied ya ki 90 tylli wa biang dooh wei da chah khut ki cha Geneva, Switzerland yow pynbna ya kiwa jop. Ka Meghalaya da yaleh ko wa kiwi ki Project na Australia, China, Argentina wa Tanzania. Ka Meghalaya Enterprise Architecture toh du ka napoh ka ri India wa yoh khusnaam ha uni u snem.
Ka Meghalaya Enterprise Architecture (MeghEA) Project toh kawa pynkrehkaam da ka Planning Department, ka sorkar Meghalaya wei da em ko boon ki bynta yow pynyajan yaka sorkar cha kiwa chong chnong wa kynthup ya ka E-Proposal System yow smat u pynlait ya ki Scheme wei wow booddien yei krehkaam ki Scheme. Deiwa pynemkaam da ki stat ka juk wa katni (Information Communication Technology) waroh ki kaam hadooh wow pynlait poisa ya ki Scheme sorkar da leh deiwa krehkaam lang kiwa boon ki chnat sorkar.
Ha ki ar bnai da yoh awjan 1600 tylli ki “Proposals” lyngba ka e-Proposal System heiwa ka poisa wa T. 790 klur da booh bhah wei kini toh nachwa kiwa chimpor da ki bnai wow leh.
Ka Meghalaya Enterprise Architecture toh kawa da sdang hapoh i yahluti ka NeGD (National e-Governance Division) deiwa ya krehlang wa kiwa boon ki chnat sorkar wa kiwa na baar yow ye u lai bait ini. Ka sorkar Meghalaya da dep ko leh wow phah ya ka tyrwa “Proposal” cha ka World Bank yow pynheh chooh chooh ya kani ka Project.
