Uwa rwai kamjooh uwa chna sur wa pawnaam ka ri, uwa tip kam u KK uwa pyrtuid tre Krishnakumar Kunnath da khlaad noh u ha ka 31 tarik ha Kolkata hei rta wa 53 snem.
U KK da chitom syndet u hadien wa dep rwai ha Nazrul Mancha neibynta ka Gurudas College Fest heiwa da liwan u cha ka Hotel u.
Hadien wa joor i chitom u, da li kit ya oo cha CMRI Hospital ha Kolkata tangwa da khlaad noh u ha luti heiwa da pynbna toh wa da khlaad u heipor 10:30 i miet.
U KK da pawnaam u hadien ka thup rwai wa nyngkong wa pynmih u kawa da e pyrtuid “Pal”. Da chna u leh boon ki rwai wa pawnaam neibynta ki phlim Bollywood kam i Tadap Tadap (Hum Dil De Chuke Sanam), Dus Bahane (Dus), Tune Maari Entriyaan (Gunday), Gori Gori (Main Hoon Na), Tu Jo Mila (Bajrangi Bhaijaan), Kya Mujhe Pyaar Hai (Woh Lamhe) wa kiwi de.
Da ieh u chadien ya arngut ki khon waka kurim u.
