Ynne ka sngi, ka KSU Narpuh Circle da lai pait ko ya u sarok NH-06 nadooh Mynkre chadooh Malidor-Ratachera heiwa da chem wa da ki phaw tylli ki thaw wa da oor khyndaw ini wadep ym pu em pynkhooid daka National Highway Authority of India (NHAI).
Ka seiñ da ong ko wa i pynkhooid ya kitai ki khyndaw toh iwa kajiak chi thaw wei da man kamwa tieñ wei i sahkut ki kari leh dang joor bha i man-ka-sngi neibhah wym yoh ki kari u lai waroh arliang ha kitai ki thaw wa da dep oor khyndaw.
Chooh chooh ha ini i lai pait da chem wa em du ar tylli ki pooh chi-loom ha Malidor. Wei ki wakreh pynkhooid sarok da pynbaad ki wa kiwa yah kari ym e laad ki wow pynkhooid sarok heiwa da ye u pynsangeh ki du chipor donhi wei na ini i daw heithaw u smat da chimpor noh wow pynkhooid.
Heipor wa ka seiñ poi ko heini da yoo wa kitai ki pooh chi-loom toh kiwa chong hi-eh wei da khana ki wa ki kari ym e laad wei da lai ki khlem sangeh. Wei da chem leh wa ka NHAI ym em leh ko iyi iyi wow pynchna ya ki thaw wa da sih kam ki thlu wa da em ha tymbud uni u sarok hadooh wa ki kari kit mar ym ye de ki u lai.
Kamtæ ka seiñ da lyngngoh ko wa da palat 20 sngi wa da rang u slap tangwa ka NHAI dang yoh thiah ko wei lada kamni, ka seiñ ym yohsa ko wow pynyoo dei kaam khnang wa ka NHAI kamjooh ka sorkar u pai chkoor ko.
