Ynne ka sngi ye ko wow man ka sngi wa kyrpang neibynta ka thaaiñ Ri-loom Jaiñtia wa ka jylla hi leh waroh kawi heiwa da pyrchang wow pynkhai-im biang ya ki ar tylli ki wah ha East Jaiñtia Hills, kitæ ka Wah Kyrhuhkhla wa ka Wah Lunar.
I rukom wow pynkhai-im biang ya kini ki wah toh deiwa pynemkaam ya i stat Phytoremediation Technology deiwa pynemkaam da i aitlen (Algae) wa kyrpang wow pynlait cha kini ki wah.
Ya ini i kaam da ekti ha ka karkhana wa tip kam ka Trinity International heiwa kani ka karkhana u kreh ko ar snem wow pynkhai-im ya kini ki wah neitæ won u chimkti won ka chnat khloo ka jylla ya ini i kaam na ka karkhana.
Ya ini i kreh da wan wai ha Umsyllih, Khliehriat West ynne ka sngi kam chibynta yong ka Sngi ka Rymaw namo ka World Environment Day da u Montri ka chnat khloo ka jylla, u James K Sangma hei emlang ki sahep ka chnat wa kiwi kiwi.
U E. Kharmalki uwa man kam u Secretary ka chnat Mining and Geology ka jylla da ong u wa ini i pyrchang wow pynkhai im biang ya kini ki wah man iwa emkaam bha khnang wow man i kam ka nongmuna ya kiwi tawon wei da kyntu u ya ki Waheh Chnong na ki ynru chnong wa em ha tymbud ka wah Kyrhuhkhla wa 25 chnong ha ka Wah Lunar wow kyrchaan ki ya ka sorkar wa ya ka Trinity International wow e ya i thaw wow pynkhai im biang ya kini ki wah deiwa yoh wow chna ya ki nan wow pynlang ya i aitlen.
Heiyatoh wa i por wow chim khnang wow ye biang ki dohum wow wan cha kini ki wah, neiliang u Montri ka sorkar jylla, u James Sangma da ong u wa ini waroh chong i ha i rukom krehkaam ka rymaw wei kammon u sdang khooid biang kini ki wah deiwa kyrmen skem leh wow pynemkaam ya ini i jooh i sap ha kiwi tawon ki wah ha ka jylla.
I kreh neibynta ini i kaam da mang wow pynlut na ka Meghalaya Environment Protection and Restoration Fund (MEPRF) ya kawa da yoh na ka dan u mooyong ha ka jylla heiwa yeini i jooh da dep leh ha ka wah Lukha heiwa kini ki aitlen da ye ki wow baam yei bih wa em ha ka um.
Puræ leh: Lai pait u James Sangma yei kreh pynkhai im ya ka wah Lukha
