Ka All Jaiñtia Mid Day Meal Workers Union (CEC) Jowai, da pynsñiaw ko ya i sñiaw takha hadien wa yoo da puræ ya ka khubor yei klam u Kyrmen Shylla, Montri ka chnat Social Welfare uwa da ong wym dap poisa wow pynku ya ka tulop ki wakreh kam ki Mid Day Meal Cooks.
Kam kiwa chet ja sngi ya ki khynnah ha ki skur dang yooluti bha i, wa kam u Montri wa pait ya ki kynthai ki khynnah toh u klam u kyrha u neibynta i chngaaiñ kiwa chet ja sngi ya ki khynnah ha ki skur, kiwa boon tam toh ki manbei ki khynthai. Tangwa batai u ya ka chnat kawa ym toh ka yong oo, ha kawa ka seiñ dang kyrmen bait ko wa daw klam u Conrad K Sangma kam u Montri Rangbah ka jylla kamjooh u Lahkmen Rymbui u Montri wa pait ya ka chnat puræ puthi waka Mid Day Meal Scheme namo ka PM POSHAN heiyatoh wa i kyrpaad ka seiñ iwa da dep e dei thoh da boon tylli.
Ini i klam i yong u Kyrmen Shylla kam u Montri da yahbakla u ya kiwa chong chnong ka jylla heiyatoh wa i rukom e sñiawbha ka sorkar jylla da ka poisa ya kiwa chet ja sngi ya ki khynnah ha ki skur khamtam da pyntakha bha ko ya i sñiaw wei da ktah bha ko ya i pyrkhat pyrdaiñ yong ki hajar ngut kiwa chet ja sngi ha Meghalaya, kiwa da yaleh dohyap dohim u pynbiang pyntoh ya i baam iwa bha tam katkam wa da hukum da ka sorkar lyngba ki Head Teacher yow tei ya i doh i pran ki khynnah skur hadooh wa em i por iwa da mylliñ ki u pynbiang baam ya ki khon tre ki yong ki. Ha kawa boon sien, ka ktien kawa jooh ong ki “Lehbha chwa na yung, da jooh wiar ko na kiwa chet ja sngi.”
Khnang yow ya tiplang kiwa chong chnong ka jylla, ka sorkar India lyngba ka chnat puræ kawa pait ya ka Mid Day Meal Scheme kawa da sdang nadooh u snem 2002 kawa katni da khut da ka PM POSHAN, ka sorkar India da e bhah ko 90 naka 100 iwa mut ka sorkar Meghalaya da e bhah ko 10 na ka 100, iwa da ka poisa ka sorkar India da e sniawbha ko T. 900 katwa ka sorkar Meghalaya won e ko T. 100 donhi ha ka chibnai, wei deiwa su du chiphaw bnai donhi ha ka chi snem. U bnai Duyatra (Jan) wa u Kmaichonglad (Dec) ym em e poisa ka sorkar (iwa tang u pynkmen khon wa toh ka Christmas namo wa u pdiang ya u snem thymme, wow thied kot skur, thied Uniform hap da pyrkhat boonsien neiwon u yoh poisa).
Kiwa chet ja sngi ya ki khynnah skur sdang ki u pynkhreh u chet ja nadooh 8:00 waje i step kat hadooh u dep u pynkhooid, u sait u khleiñ u thied jhoor neibynta ka sngi wa bood da poi cha ka ar/le waje i janmiet neitæ hap chet ja ki nadooh ka Monday hadooh Friday, ya katai ka poisa T. 1000 ha ka chi bnai da chong dor ko du T. 32 tam chi sngi donhi.
Ha kini ki sngi wada ku dor ki mar bam mar dih, i emkaam iwa man-ka-sngi khamtam da ktah joor bha ko ya i ki manbei wa pait yow biang i baam i dih ki khon, ki chynrang ha yung ha sem.
Katæ ka pyrkhat ka sorkar Meghalaya kamwa da klam u Kyrmen Shylla kam u Montri toh ha ka yalang ki kynthai kawa man ha Shillong, yow yaleh u pynku, u pynbha, yow chngaaiñ ka rukom im ki kynthai. Heiwa ha kiwa chet ja sngi ha ki skur kiwa boon tam toh ki manbei ki khynthai, da klam pyntakha donhi u ya i sñiaw i yong ki. Hanla lyngba i baam iwa chet ki da yarap ko u tei ya ki khynnah, da yarap ko u pynwan biang ya ki khynnah cha ki kamra skur ka ri India wei ka jylla Meghalaya da yoh ko ya ki khynnah kiwa tip ya i kaamram wa bha kam kiwa chong chnong.
Hei sakhiat dang yooluti i wa kam u Montri wa pait ya i manbha wa i man miat i chngaaiñ ki kynthai ki khynnah da toh u klam u kyrha u yei eh i khoo yow chngaaiñ kiwa chet ja sngi cha u Montri Rangbahdooh ka ri India wa cha u Montri Rangbah ka jylla wa cha ka Montri ka sorkar pyrdi wa pait ya ki kynthai ki khynnah namo cha u Montri ka sorkar pyrdi wa pait ya ka puræ puthi.
Kamtæ, kyrpaad i ya u Kyrmen Shylla kam u Montri wow sñiawbha u yarap u yaklam neibynta wow chngaaiñ kiwa chet ja sngi (PM POSHAN) kiwa boon tam toh ki manbei ki kynthai yow lait u batai ya ki chnat kiwa pait da kiwi tawan ki Montri kamjooh leh yow sylli bha hachwa u klam cha ka pyrthai yow lait u takha i sñiaw khamtam ki kynthai ki khynnah.
Ka kyrwoh na ka Joycifull Lipon, General Secretary ka All Jaiñtia Mid Day Meal Workers Union (CEC) Jowai.
