U MLA ka Khliehriat uwa man leh u Montri ka sorkar jylla, u Kyrmen Shylla da ong u wa heiyatoh wa ki kaam wa dang sahteiñ kiwa angnood u wow leh toh wow wanrah ya ka Football Stadium neibynta ka East Jaiñtia Hills Sports Association.
Da ong u wa ka Government College leh man ko kawi na ki kaam wa thrang u wow wanrah, deiwa e khublei ya u Montri ka chnat puræ puthi, u Lahkmen Rymbui wa da tipmit hapoh ka Peoples’ College Scheme yaka Jaiñtia Eastern College deiwa pynrap wa i kwah hi ki paidbah ka District toh ya ka Government College deiwa ngait skem wa manda skem i rukom yoh poisa ka sorkar daw ye wow sdang ya ka.
Da klam u leh ya ki sarok, ki yingkieñ kam ka Moolamanoh, u sarok na Loomchyrmit cha Shkentalang heiwa u Montri Rangbah leh da ong u wa ye wow yoh ya kani ka sarok.
Heijooh i por da ong u wa ka sorkar da kwah ko wow pynpoi um cha waroh ki manyung lyngba ka JJM, wei dang emkaam ya kiwa kreh kamjooh leh ki tiar ha ka Khliehriat Civil Hospital deiwa ong u wa daw booddien khlem chongsngi.
Heiyatoh wa i yoh kreh, da ong u wa kani ka phang toh kawa emkaam bha ya ki khynroo khyllood kamtæ da pyrchang wow wanrah ya ki e sikai namo ki Skill Development, wei kamjooh leh wow pynchlur ya ki wow seiñ kreh ki.
U Kyrmen da ong u wa ka District man ko kawa miat bha heiwa da em ki kchaaid, ki loom wa ki khloo wa rben, wei ha ki sngi wa dadep da yoh ya ka poisa wei da e ya ka Work Order wa duna T. 2 klur wow pynmiat ya ki thaw uiñke, wei neini chaphrang daw booddien leh ya kiwi tawon ki kreh.
