Ka FKJGP-Khliehriat Circle hapoh i yahkhmat u Michal Chyrmang kam u President ka seiñ, ynne ka sngi da lai yachem ko ya u H. Iakai uwa man u Executive Engineer ka MePDCL Moowakhu, East Jaiñtia Hills wow pynsñiaw heiyatoh wa i sih u Transformer hapoh ka chnong Khliehriat West ha ka Dong Lumsiatthong.
Ka seiñ da ong ko wa uni u Transformer da sih u la kamwa ar tayaw tam, wei hawa yachem ynne, u sahep da ong u wa dadep pyntip u cha ki bor wa hajrong wei katkam ka yutip wa yoh u da ong wa ym em Transformer de da kiwa thymme.
Uni u sahep da pyntip u leh wa katkam wa man hadooh katni da em hadooh 30 tylli ki Transformer kiwa da sih hapoh East Jaiñtia Hills.
Ka seiñ da sñiaw diaw ko neibhah ka Khliehriat man ko ka Headquarter ka District wei hadooh ar tayaw wa sih u Transformer dang chong ki paidbah hei doom i langoh wei kat ka MeECL ym em Transformer ko, deiwa ong wa kani ka yung krehkaam toh u booh chwa ko ya ki Transformer kiwa thymme khnang wow kylliang salan lada em wa sih.
Ka seiñ hawa khaddooh da dawa ko wa toh u wanrah smat ya ki Transformer wa khlan bor wa dang krehkaam kiwa ye u pynpoi ya ka bordiñ wa khlan ym toh kat i bor mombati donhi ha ki chnong ki thaw khamtam ka Khliehriat West.
Da kyrpaad leh ya u MLA ka thaaiñ u Kyrmen Shylla wow chimkhia ya ini.
