U Montri Rangbah ka jylla, u Conrad K Sangma da pynman u ya ka yalang wa ki Deputy Commissioner yong waroh ki District deilang wa ki chnat sorkar wa toh u pait yei chah ktah hei bor ka rymaw hadien wa u slap wa joor da pteiñ u uwa da wanrah yei chlai um wei oor khyndaw ha kiwa boon ki bynta ka jylla.
I oor khyndaw da khang i ya u sarok wa lai luti cha kiwi ki jylla khamtam u NH06 hadien wa jan tkut iwi i bynta ha Lumshnong iwa da jia ynne. Kamtæ u Montri Rangbah da phah u ya waroh ki DC wa ki chnat sorkar wow leh smat ki yeiwa emkaam yow lait u sahkut i lai i wan ki mar wa emkaam.
Da thung leh da ki Regional Committees ha East Khasi Hills wa Ri Bhoi District wow yahkhmat da u Symbood Montri Rangbah, u Prestone Tynsong, ya ka Jaiñtia Hills daw pait da u Montri ka chnat pohyung, u Lahkmen Rymbui deiwa yarap da u Montri ka chnat Social Welfare, u Kyrmen Shylla. Neibynta ka West, South West wa Eastern West Khasi Hills Districts daw yahkhmat da u Montri ka chnat PHE, u Renikton Lyngdoh Tongkhar katwa ki District ka Garo Hills daw pait da u Montri ka chnat i chait i khiah, u James Sangma.
U Conrad da kyntu u ya kini kiwa da pynkitkaam wow lai pait ki ya kini ki thaw kiwa da chah ktah kamjooh wow booddien deiwa phah leh ya ki DC wa ki chnat sorkar wow chimkhia bha ya kini ki 72 kynta yow pyntikna wa duna i chah ktah ki paidbah.
