Ka Khooid Yaka Wah Myntdu (KYWM) da pynsñiaw ko yei sñiawsih wa i pyrchah ya ka M/s Dhar Construction Company wa yaka yung krehkaam u Executive Engineer PWD (R) Jowai Central Division, Jowai kawa da e laad ya katai kawa chna ya utai u surok wow noh wow pyntooid biang yei khyndaw wa wa oor ha u sarok cha ka wah Myntdu katwa ngait wa sñiaw suk ki ha i bynta iwa khut kam ka Dam Ser.
Ka KYWM da ong ko wa ini i rukom kreh kani ka Construction Company da ktah ko ya kiwa wan wa lai nadooh ki khynnah wa lai puræ, wa khih wa mylla kiwa wan cha Jowai na War Jaiñtia kamjooh kiwa lai.
Nadooh uni u snem da chem wa da boonsien wa oor khyndaw ha itai i thaw wei neiliang ka seiñ da boonsien wa ujor ko cha u EE ka PWD (R) Jowai Central Division wa cha u Junior Engineer (JE) pyrchah ya i pynkai yei khyndaw wa oor cha wah Myntdu khamtam wa da chem wa ka JCB da ngiat da pynkai ko ya katai ka khyndaw cha ka hali yow kai cha Myntdu, wei ym jooh kit ki ya itai i khyndaw da ki Truck Dumper cha itæ i thaw noh khyndaw yong u Contractor.
Ini i leh habra ka M/s DCC wa ka PWD da ktah joor bha ko yaka wah Myntdu khamtam ya ka Mupiah ka thaw pynlang um ka yung krehkaam u EE PHE, Electrical Division Jowai, kawa saam um cha ki yung ha Jowai. Katai ka thaw pynlang um da dap khyndaw dap chyiap bha ko, ha kawa da booh ko ya kiwa kreh hei eh hei khoo u pynkhooid ya ka um, hadooh wa kiwa chkæh um na PHE da saja um ki heipor wa hiar slap wa jngut ko, ijooh leh hadien wa da rang u slap da duna i pynpoi um neidaw wa dap khyndaw ka Mupiah.
Na ini i khyndaw wa da pynkai cha Myntdu da ktah joor bha ko ya ki pynthor kba wa em cha wah ha kawa da pyn jngut ko dei khyndaw wa soo wa pynkai na itai i noh khyndaw na utai u sarok. Ki pli ki warep ki tre hali da yaam da kiad wa daw dooh kba wa da dap khyndaw dap chyiap ki hali ki yong ki.
Katda kamtæ lada pait i wa neiliang ki chnat sorkar khamtam ka PWD (R) wa u Deputy Commissioner WJHD ym bna ki, da hun ki u pait du ki khmat i yong ki, ym pynchitom ki ya kam itai i leh pyrchah aiñ ka lehbeiñ ya ka Myntdu ka tawiar waroh kawi.
Kamtæ da kyrpaad kyntu joor ya waroh kiwa chong chnong tawiar ka Myntdu khamtam kiwa ha Jowai, yow yieñ yaleh pyrchah ya kam ini i leh khiar, leh pyrchah aiñ ha kawa lada ym yieñ yaleh i u pyndooh ya ini i leh nadooh katni, ka Myntdu ka bor kawa pynim ya kiwa im nadooh i ki bru wa chkæh um, ka la’er, u skem i khyndaw ka yurim yung, u kba u khoo, hadooh ki doh um doh wah daw dooh daw dam daw saja ki kiwa katni wa ka pateiñ kawa daw heh ha ki bnai kiwa daw wan. Khamtam kamwa da chynna i katni wa ka Myntdu da pyndap chwa ya ka da u chyiap ka khyndaw.
Ka kyrwoh na u Dapherborn N Suchiang, General Secretary ka Khooid Yaka Wah Myntdu.
