Kiwa chong chnong ka Kharkhana, Pasadwar wa em hapoh ka Amlarem Block wa ka Borghat kawa em ha East Jaiñtia Hills da syir mynsien ki neidaw wa ki chnong em ki hajan ka Wah Myntdu (Tisang) wei da chlai um kani ka wah iwa da ktah joor ya kiwa chong chnong khamtam kiwa em yung harood sarok neibhah i ku ka um da tympiah tympra i ya ki luti wa kamjooh iwa em ha kini ki chnong.
Hajrong ini da kyrpaad ki ya ka chnat ka sorkar jylla wow kyruiñ cha kani ka thaaiñ deiwa e yarap ya ki paidbah khnang wow lait nei khuslai neibhah wa ym yoh thiah ki dei miet khamtam manda poi um weiwa ya ki lieñ wa em da hap pait ki kamjooh wow sumaar ya ki man-i-por neibhah ya ki lieñ da pynemkaam ki wow kit ya ki mar wa har rukom wa mih na kini ki thaw.
Heijooh i por da pynsñiaw ki yei mynsien wa khia yei wym em yingkieñ ha ki wah khian kiwa kynthup ya ka Amlati, Amsohkyrchoh wa ka Ammara neibhah manda chlai um kini ki wah tyllep ki ya ki luti wa ki sarok iwa ktah ya i lai i wan ki bru hawa kit ya ki mar rep wei khamtam heipor wa em kiwa chitom wei khamtam hawa em kiwa pun-khon.
Da ong ki leh wa kini ki wah ktah ki leh ym du ya kiwa chong chnong ka thaaiñ khapood ka West Jaiñtia tangwa wot ha East Jaiñtia leh kamjooh.
Hajrong ini waroh kyrpaad da kiwa chong chnong ka thaaiñ ya ka sorkar wow kyruiñ leh cha ki neibhah wa boon hi na ki toh kiwa duna hei yoh i laa.
Heijooh i por da kyntu leh ya kiwa mihkhmat wow pait ya ki paidbah ka thaaiñ deiwa thooh luti kammon wow wanrah ya ki yingkieñ ha kini ki wah khnang wow lait ki paidbah nei yaam kthang heipor wow pynkit ki ya ki mar rep yong ki.
Neiliang u President ka HYC War Jaiñtia Circle u Yoodahunki Shylla hadien wa da yaklam u wa kiwa chong chnong kani ka thaaiñ, da kyntu u leh ya ka sorkar jylla wa ya u Montri ka chnat Disaster Management wa ki bor District wow e yarap cha ki manyung kani ka thaaiñ.
