U slap wa joor ha kini ki sngi wa dadep da pynthut u ya i lai i wan ki bru neidaw i oor khyndaw wa i chlai um ha ki sarok, wei ynnin ka sngi da chah rong i bynta u sarok NH06 hajan ka Tollgate Lumshnong.
Ini i tkut ini i bynta u sarok da wanrah i yei sahkut da ki spah tylli ki kari wei da chah ktah da ki hajar ngut ki bru.
Heiyatoh wa ini i sahkut ki kari wa ki bru, kiwa kreh sñiawbha ka Kyrmen Foundation kawa man kawi na ki seiñ kreh monsñiawbha ha East Jaiñtia Hills ynnin i miet da mih ki wow lai e yarap ya ki bru wa sahkut da ki mar baam, ka um kamjooh leh ki dawai.
Neidaw wa joor i sahkut ki kari, kiwa kreh da lai kjat ki hadooh kamwa 5 Kilometer ha u slap wow poi ha i thaw wow e yarap cha ki paidbah wei da ye wow pyndep hadooh 11:00 waje i miet.
Neiliang ki paidbah kiwa yoh yarap da e khublei ki ya ki wei da kitbok ki leh ya kini kiwa kreh wa da wan ki chaphrang wow yarap ya ki ha kam ini i por.
