Kamwa ki sngi ki tayaw ka Chaad Niam Behdieñkhlam da jan poi ki hapoh ka Raij Jowai, ki chakri niam ka Raij leh da man kiwa ya boonkaam hei wow pyndep ya ki lehniam waphær wei ha kani ka tayaw da poi i por wow pyndep yei yong ka khang ka kah nae i kñia e ngooh e dem e bhet e bhar wa chisien chisnem ya ki Blai chnong Blai Raij.
Ya ki sarin yong kani ka lehniam da sdang nadooh ka sngi Mulong 18 tarik Naiynru da ka Dih Soopen ha yung Langdoh neitae ha ka sngi wabood Musiang 19 tarik da pyndep ya ka Kbai Mooknor katwa ha ka sngi Muchai won i step u pyndep yei bhah i bynta ka khang ka kah haman ki phang wa em ki Soodwar Sooluti deilang wa ya ka Tawiar Takan.
Hei sakhi ya ka Lehniam Kbai Mooknor wa da man ynne ka sngi Bibar hei yahkhmat u Dolloi kam u khlieh ka niam khlieh ka Elaka chirup u Pator, u Langdoh, ki Sangot, ki Wasan, ki Phrakur Phrakmai wa ki Waheh Wasian ka Raij damih ki chakhmat ka Yaw ka Syiem wow e wyrta chula hapyrdi kiwa wan yaw wan haat wa kiwa chongdai wa datoh i por wow pyndep ya ka Lehniam Knia Khang nae ka Knia e ngooh e dem, e bhet e bhar ya ki Soodwar Sooluti wa ya ka Tawiar Takan kiwa man ki Blai Chnong Blai Raij wa da pynchong pynthiah nadooh wa sdang ka raij ka chnong deilang ki hukum adong niam.
