Ka chnat Bordiñ yong ka jylla ym ye ko wow e jubab ya ka Right To Information (RTI) wa da paan da u Disparsing Rani hajrong i yoh bordiñ ki bru kiwa sah ha Them Metor, Them Iewmawlong.
U Rani da ong u wa da paan ya ka RTI na ka MeECL yow tip yei sakhiat wei ha ka 01-04-22 da paan RTI u na ka Meghalaya Energy Corporation Limited yow tip lada ki bru kiwa sah ha Them Metor em ki namo ym em ya ki kot ki sla, neibhah wow yoh bordiñ ha ki yung da emkaam ya ki kot ki sla wow pynsakhiat, tangwa da ong u wa kattu da jan dap ar bnai ym pu yoh yei jubab wot hadien wa da pynkynmoo (Appeal) leh ym em wa jubab iyi iyi.
Da pyntip wa ki yutip wa da paan ha ka RTI kynthup ya ki kaam ha MeECL, i chong ngiah ki wakreh, ki kot ki sla wa emkaam yow pyndait bordiñ thymme, wei da paan u leh yei pytruid bru wa sah ha Them Metor (Harijan Colony), ki kot ki sla lane pata yong kitai ki bru, ka NOC wa da e da u Syiem Mylliem lane ka SMB hachwa wow pyndait bordiñ.
Da ong u wa katkam ka aiñ RTI, hawa paan ya ka RTI ka chnat toh u e jubab hapoh 40 sngi, tangwa kamwa man katni da palat 40 sngi wei da e Appeal nadooh ka 7 tarik uni u bnai, tangwa ym yoh yei jubab, wei da maham wa lada ym jubab daw ujor yeini cha u Chief Information Commissioner ka jylla.
