Ka Art of Living Jaintia Hills Unit ha ka thong wow kynmoo warom ya ka International Yoga Day chirrup wa ki khynnah skur ha ka sngi Pyngkat 21 tarik Naiynru da pynman ko ka yalang kyrpang ya ki khynnah skur ka Pohmusiang UPS SSA wei da ya chimbyntalang leh da ki dkhot ka Nehru Yuva Kendra Sangathan, Jowai wa ki dkhot ka District Legal Services Authority, West Jaiñtia Hills District.
U Kamnipaya Challam, Yoga Instructor Art of Living Jaintia Hills Unit hei pynyoo ya kiwa ya chimbynta chaphang ki rukom ka Yoga wei kyrpang leh ya ka Asana, Surya Namaskar, Pranayama wa ka Meditation da ong u kam waka Yoga hi man ko ka laad ka luti wow saiñdur saiñdar yei longbru manbru yong i toh u chimkhia leh wow tip ya ki rukom yong ka neibhah i ye u leh tista ya ka man-ki-por yarap ko wow pynman ya i kiwa chait wakhiah.
Ha kani ka jooh ka sngi ka RC Eve Secondary School, Mihmyntdu chirup wa ka Children Home, Jowai leh da pynman ki i lehburom ya ka International Yoga Day wei chwa wow yoh ki khynnah u ya chimbynta hei leh ya ki rukom ka Yoga da em chwa ka pynsñiawthooh heiwa ka Tina Lakiang, Secretary SMC da e ko ki kyntien yahkhmat katwa ka Esalanmidaka Lyngdoh, Superintendent Children’s Home, Jowai wa ka Panbiang Kyndiah, Yoga Teacher da e ki i klam i batai chaphang ka Yoga wa ki rukom yoh myntoi hawa pynmyllien u leh ya ki rukom yong ka.
Kat kam ka wyrta wa yoh da ong wa ha Laskein Block leh ya kani ka sngi da kynmoo warom da ka Seinraij LPS SSA, Mukhap, Umsalait Banmuhor LPS SSA, Saphai Kympreng LPS SSA, Pynthorsuwei LPS SSA katwa ha Amlarem Block wan ki skur wa ya chimbynta hei leh warom ya ka International Yoga Day toh ka Muktapur Bengalee Govt. LPS, Muktapur Bengalee UPS, Manghairyum UPS SSA, Shnongpdeng Govt. LPS wa ka Manghairyum LPS.
