U Director General of Police, Meghalaya, u Dr. L R Bishnoi da khana u wa kiwa da chah kdoh chah khoom hei pynemkaam drugs ha India da em ki 7.3 klur ngut wei 1.2 klur ngut toh ki khynnah wa em hapyrdi 11-18 snem i rta wei na kini 55 lak ngut toh ki kynthai.
Ha Meghalaya da pyntip u wa da em kamwa 2.5 lak ngut kiwa pynemkaam drugs wa kynthup nadooh kiwa dei Inject wa kiwa dih da kiwi ki jait dawai wa pynmuaid.
Da khana u wa ka jylla Meghalaya neidaw wa em ko hajan ka Golden Triangle da man ko leh kam chibynta ka thaw wa pynlai yaw yei drugs yow poi cha kiwi ki thaaiñ wei ini da pynman ko ya ki pulit wow man ki kiwa paibniah yow khanglaad yeini.
U DGP da khana bniah u leh ya ki luti wa da pynemkaam da kiwa khayi drugs wei ki pulit deiwa ya krehlang wa kiwa tip chaphang ini da ye ki wow kem ya kiwa khayi drug najrong wa pynman leh yei pynsñiawthooh paidbah ha ki skur, ki College wa ki chong ki thaw nadooh kiwa em cha sor wa cha palatsor.
Da khana u leh wa ha kini ki 15 sngi ka Meghalaya Police da pynman ko 142 tylli ki yalang wa yatoh wa i pynsñiawthooh paidbah hajrong i maa wa mih nei pynemkaam drugs ha ki skur ki College wa kiwi ki thaw paidbah heiwa da chimbynta da palat 15,000 ngut ki khynnah.
U DGP da ong u yeini ha ka yalang wa man kam chibynta ka International Day against Drug Abuse and Illicit Trafficking wa da pynman ynne ha Shillong ha U Soso Tham Auditorium, heiwa u Deputy Chief Minister ka Meghalaya, u Prestone Tynsong da man u kam u kongsan katwa u Minister, i/c Home (Police), Lahkmen Rymbui da man u kam u symbood kongsan.
Ya kani ka yalang da pynman da ka Social Welfare Department, Meghalaya waka Meghalaya Police deilang wa ki NGO hajrong ka phang “Addressing Drug Challenges in Health and Humanitarian Crises.”
