U Lat ka jylla, u Satya Pal Malik ynne ka sngi da wan wai u ya i yung thymme ka skur wa ka College ha Barapathar, Shillong ya iwa tip kam ka Kanchi Kamakoti Vidya Bharati Vidyalaya.
Hawa e yei klam ynne ka sngi, u Satya Pal Malik da ong u wa dang duna bha i kyrchaan ya i stat i tip hapoh ka ri heiwa du 6% na ka mang tangka da pynemkaam ya i puræ puthi heiwa ki skurbah ha USA wa UK em ki da ki spah ngut kiwa yoh yei naam Nobel Peace Prize, wei ka India won em ko du 12 ngut donhi.
Da ong u wa i puræ puthi ha India dang duna bha i neidaw wa ym em wa kyruiñ wow chimkhia ya ka, deiwa pynrap wa ki bru emkaam ki wow kyntu kynrong ya i puræ puthi khnang wow pynkhlanbor ya ka imlang sahlang.
U Lat da yaroh u leh ya ka Kanchi Kamakoti Shankara Health, Education and Charitable Trust wa da wanrah ko ya i kylla heiyatoh wa i puræ puthi ha ka imlang sahlang liang wanang.
Ya kani ka skur thymme da chna ha i thaw wa e sñiawbha da ka kur Geonka na Shillong wei da hikai ya ki khynnah hadooh Class 10 nadooh u 2004. Katwa ya kani ka yung thymme da e da ka Kanchi Kamakoti Shankara Health, Education and Charitable Trust kawa pynlai ya ka skur Purvottar Janajati Shiksha Samiti wa ka Meghalaya Shiksha Smiti.
Ha kani ka sngi u MLA ka thaaiñ, u R. Rapsang da e yarap u hadooh T. 15 lak cha ka skur neibynta i chuki ki miej.
Kiwi kiwa da klam ha kani ka sngi kynthup ki ya u Dr. Nalin Mehta, Director NEIGRIHMS wa kiwi kiwi.
![](https://i0.wp.com/wyrta.com/wp-content/uploads/2022/06/vjhgjhh1.jpg?resize=962%2C640&ssl=1)