Ka seiñ Jaiñtia Students Union (JSU) hapoh i yahkhmat u General Secretary yong ka, u Treiborlang Suchen wa u Vice President u Aplang Lamare ynne da lai e ki yei kyrchaan ya kiwa sikai hapoh ka lama ka Federation of All School Teachers of Meghalaya (FASTOM) kiwa pynman yakhih haphrang ka Secretariat Shillong.
U Suchen da ong u wa neiliang ki FASTOM da yachem ki ya u Symbood Montri Rangbah ka jylla, u Prestone Tynsong uwa da ong u wa ka dhab ki Montri namo ka Cabinet ym em yoh ko u chong kamtæ ymye wow e rai heiyatoh wa ini i kaam tangwa da kular u wow pynku ya ka poisa yarap.
Hajrong ini neiliang u Suchen da ong u wa ki Montri da chong yalang ki la ar le sien nadooh wa sdang yakhih kiwa sikai wei ym em u yaklam hajrong ini i kaam deiwa pynrap wa ka seiñ dawa ko na ka sorkar wow pynman ya ka yalang wa jhan hajrong ini i kaam.
Chooh chooh da ong u wa katni em hadooh kamwa 8,000 ngut kiwa sikai ha ka jylla wei khlem kiwa sikai (kiwa yakhih katni) daw chah ktah ki khynnah wa ka mynried yong ki.
Kam wow kdaw heini kiwa sikai Adhoc da dawa ki ya i chisien pynku ya ka tulop na ka T. 12,000 cha ka T. 18,000 chi bnai wa i pynku won da 5% ya ka man-u-snem.
U Suchen da ong u leh wa yi myntoi wow chna ya ki Mini Secretariat ha ki District Headquarter katwa ya ka tulop kiwa sikai ymye wow su cha kiwa sikai khnang wow ye ki u chakri ya ki khynnah skur wei kamjooh leh wow wanrah ya ki kaam pynroi ha ki thaaiñ palatsor.
Da pynkut u wa ka JSU hi da raikut ko wow kyrchaan ya kiwa sikai ha kani ka kynti wa i yakhih yong ki.
