Ka Thomas Jones Synod College Jowai, ynne ka sngi da pynman ko da ka yakob yalehke Chess kawa tip kam ka Open District Chess Competition kam chibynta i lehkmen yaka Silver Jubilee yong ka College deiwa ya krehlang waka Jaiñtia Hills District Chess Association.
Haka yalang tbian wa pynlai da u M.J. Lamare, Asst. Professor, Thomas Jones College, u P. Lhuid President ka Jaiñtia Hills District Chess Association da pynsñiaw u yei myntoi wa ye u yoh nei yalehke Chess deiwa ong wa yarap ko yow bru u ye u pynlai yumut, u pynbait yei lai luti hawa im, u man kiwa yaichah, u man kiwa khlan i bor kynmoo i jabieñ wa kiwi de.
Da pynrap haroh u wa kamwa i doh i pran emkam ko ka Exercise, i jabieñ leh emkaam ko yei jooh wei i yoh yei jabieñ wa chait wa khiah yoh leh yei doh i pran wa chait.
Heijooh i por kamwa chwa u sdang næ lai chakhmat yei yalehke hap wow pyrkhat pynkhreh bha, wei man i jooh hi hei im u bru leh wa ha iwon iwon emkaam u pyrkhat chwa yow lait u bakla.
Neiliang u kongsan, u Brightstar Chyrmang, MDC Jowai North da pynsñiaw u i kmen waka Chess wa kiwi ki jait yalehke da sdang lai ko chakhmat haka thaaiñ yong i kawa ki bru rap ka-it dooh ki yei yalehbol.
Hawa kyruiñ u heiyatoh i hiar ka yalehke Sport hapoh ka jylla, ong u boonsien toh wa ki bei ki pa khanglaad ki ya ki khon, neitæ wot ka sorkar leh wym jooh em ko yaka Sports Policy lane u e iwon iwon i yarap yow ye kiwa emsap u ku ne pynpliah yei sap yong ki.
Kamtæ yooluti u wa lyngba i pyrchang ka sorkar ini wadep u wanrah yaka Sports Policy neini chakhmat daw ye u pynku yaka Sports.
Ha kani ka sngi da yoh leh i klam na u Principal ka Thomas Jones Synod College, u G.H. Lyngdoh, naka C. Bapui, Asst. Professor wa kiwi de.
Ya ka yakob da pynman ha ki le tylli ki kyrdan:
- Open Category (Class XI Above and Open to all)
- Junior Category (Class X Below)
- Women’s Category
