Kam chibynta wow yarap ya kiwa em ki dukan dukdoh wa khian khamtam hadien wa wan ka khlam kjut COVID-19 ha ki ar snem wa dadep, ynne ka sngi u MLA ka Jowai Constituency, u Wailadmiki Shylla da e yarap u mar T. 10,000 lyngba ka SRWP yong u snem 2019-2020 cha ki 406 ngut ki bru.
Ya ini i e yarap u Wailadmiki da saam lyngba ka Cheque ha ka yalang ynne ka sngi ha Ladthadlaboh Community Hall ryngkat i emlang ki MDC ka JHADC wa kynthup ya u Lakhon Dkhar, u Brightstar Chyrmang, u Ailad Bhoi, u Otomewot Lamin ki waheh chnong wa kiwi kiwi.
Ka poisa waroh wa da e cha ki 406 ngut da kynjoh ko cha ka T. 40,60,000.
U Wailadmiki Shylla da ong u wa dang ha kini ki por wa dadep da e yarap cha ki paidbah ka thaaiñ palat sor da ki tin sap yung, ki tiar mistri wa kiwi kiwi neibhah boon ki bru kwah ki da kini ki tiar.
Katwa ha sor Jowai won rap boon ki bru wa sah ha ki yung moo, wei em kiwa chongwai kamtæ da pyrkhat ka Jowai Development Committee wow e yarap da iwa rap phær wei itæ toh da ka poisa khnang wow yoh ki wow pyndap ha ki dukan dukdoh wei wow seiñ khih ki deiwa booh ya ki dukan sapria.
Chooh chooh da pyntip u wa ka Jowai Development Committee da sdang ya ka khnang wow ye u yarap ya ki bru wa em hok wei da rai wow e da ka poisa ka wow thap ki cha Bank Account yong ki wow pynemkaam ki heipor wa dawa.
Heiyatoh won wa ka MLA Scheme kawa dang sah nadooh u snem 2020, u Wailadmiki da ong u wa thut neidaw wa em ka khlam COVID-19 wei dang yang ya ka poisa wow ye u saam cha ki paidbah ha ki bnai wow wan wei iwa katni da man ko neibynta ki ar snem wei dang sah ka poisa wa le snem ka wym pu em pynlait namo Sanction.
