Ka All Jaiñtia Mid-Day Meal Workers Union, Jowai da e yaroh ko ya u Montri Rangbah ka jylla u Conrad Sangma yei em mynsien i yong oo wow kyrchaan deiwa pynku ya ka tulop kiwa sikai ADHOC ha ka jylla. Kamtæ neiliang yong ka seiñ kiwa chet ja sngi ha skur (Cooks cum Helper) haka PM-POSHAN (MDM Scheme) da dap ko dei sñiawngooh yeini i em mynsien u Montri Rangbah wow lehbha ya kiwa sikai. Yooluti ki wa daw pteiñ chooh chooh u ya kam ini i mynsien lehbha khamtam ya kiwa tlot, wa duna i su poisa.
Hajrong ini, ki Cooks cum Helper ka PM POSHAN (MDM Scheme) ha ka jylla hi waroh kawi, da kyrpaad ki sa chisien ya u Montri Rangbah wow sñiawbha u wyrai wow yarap ya ki Cooks deilang wa ki Helper kiwa boonbha toh ki kynthai wa ki manbei, yow pynku yaka Honorarium ka yong ki naka bhah ka sorkar jylla kawa da su ka sorkar nadooh u snem 2002 kawa da neh bait du T. 100 donhi chibnai hadooh katni.
Kamtæ ka seiñ da kyrpaad ko ya u Conrad K Sangma wa kamjooh ya ka sorkar jylla wow pynku sa T. 400 yow man ko T. 500 waroh ha ka chibnai. Heijooh i por da kyrpaad wow pynlait noh ya ka Honorarium kawa dang sah kawa nadooh u bnai April, May wa u June 2022 khnang wa kiwa chet ja sngi ha skur u yoh ki u pynemkaam, u pynkmen u pynka-it ya ki khon ki pyrsa yong ki ha kani ka Behdieñkhlam 2022, kamjooh leh u su u tda yei emkaam yong ki kam kiwa kreh wa khian i su.
Da kyrpaad leh wa neini chaphrang wa ka sorkar toh u su bait ko man-u-bnai kamwa da thoh ko cha ka Project Approval Board ka Ministry of Education ka sorkar bei, i jooh leh yow pynlait ya ka Honorarium cha ki Cooks cum Helper hachwa kiwon kiwon ki sngi wa kyntang yong ka Kristan, Hindu, Muslim, Sikh, Jain, Niam Khasi, Niamtre wa kiwi kiwi tawan.
Heiyatoh wa ini i kyrpaad yong ki Cooks cum Helpers ka jylla Meghalaya, ka All Jaiñtia Mid-Day Meal Workers Union da dep e ko dei thoh (Memorandum) ha u Conrad Sangma nadooh ka 03-06-2019 wei da thoh pynkynmoo (Reminder) ko hadooh ynñiaw sien kawa khaddooh haka 01-04-2022, kamjooh cha u Lat ka Meghalaya wa chadooh u Narendra Modi u Prime Minister ka ri.
Kamtæ da kyrmen wa kam u Montri Rangbah uwa sñiawthooh yei kordor yong i kreh chitom, wa i saja i im yong kiwa chet ja wa kamjooh kiwa yarap kiwa duna wa tymbuiñ hei su wa du T. 1000 donhi na ka sorkar bei, katwa ka sorkar jylla da su ko du T. 100 donhi chibnai najrong wa dang sah sa le bnai wym pu yoh yong uni u snem wym pu su ka sorkar jylla ya iwa da dep kreh.
Ka seiñ yooluti bha ko wa u Montri Rangbah u su noh u ya katai ka le bnai kawa dang sah cha ki Bank Account, ym toh de da ka poisa mar kti, kamjooh yow pynku yow su ya ki Cooks cum Helpers ka jylla cha ka T. 400 yow poi noh T. 500 i bhah ka sorkar jylla.
Ka All Jaiñtia Mid Day Meal Workers Union (CEC) Jowai, e ko ya i kyrkhu khyrdoh cha waroh ki Niamtre. “Kyrmen i wa ka manbru longbru ha ka jylla wa ka ri India waroh kawi yow nang khlan nang chait ko hei Tip Bru Tip Blai, u Kamai Yei Hok na kani ka Behdieñkhlam ha Raij Jowai, Raij Tuber wa kiwi kiwi ki Raij ki chnong ha ka jylla.”
Ka wyrta na u J.A. Suting, President ka AJMDMWU.
