Pep u Shangpliang ha ka yalang AITC tangwa poi won u cha ka yalang ka kyrtong President ka NDA

Ka All India Trinamool Congress (AITC) toh ka Party kawa em ha ka liang pyrchah ha ka yung dorbar chna aiñ ka jylla wei kawa da em i thong wow khyndang noh ya ka BJP nei bor ha Delhi, tangwa ha ka yalang wa da pynbait da ka BJP ynne ka sngi da emlang ki MLA na ka sorkar MDA wa uwi na ki MLA ka AITC, u Himalaya Muktan Shangpliang. 

Ka kyrtong ka National Democratic Alliance (NDA) wow yakhun ya ka chuki President ka ri India, ka Droupadi Murmu da wan poi ko ha Meghalaya ynne ka sngi wow paan kyrchaan na kiwa mihkhmat ka jylla (MLA/MP), ha ka yalang wa da pynbait da ka BJP Meghalaya wei da emlang leh ki MLA kiwa em ha ka sorkar Meghalaya Democratic Alliance (MDA).

U Shangpliang toh du oo u MLA na ka Liang Pyrchah uwa poi ha kani ka yalang, wei da ong u wa ym em u lai u cha ka yalang kam u dkhot ka AITC, tangwa da lai u katkam i sñiaw samen yong oo wow e mynsien ya ka kyrtong na ka jaitbru Ri-loom. 

Da ong u leh wa i wan yong oo toh nei chah khut sñiawbha wow yachem wa ka kyrtong President yong ka NDA, deiwa pynrap wa sñiaw u wow e burom ya kani ka manbei kawa da mihkhmat na ki ri-loom khamtam wa ka jylla Meghalaya man ko ka jylla Ri-loom. 

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

U Shangpliang da ong u leh wa i lai yong oo ymtoh wow leh Politics tang wow pynyoo wa em ryngkat u wa ka Murmu, wei heijooh i por da klam che u wa heiyatoh wa i thap Vote daw pait won hadien neibhah da khut ya waroh kiwa mihkhamt ka jylla ym du ya ki Party. 

Kam wow kdaw heini, u Shangpliang da poi u cha ka yalang yong ka kyrtong ka NDA wa khut da ka BJP ynne, wei ym em u poi u cha ka yalang ha ka sngi wa wan u General Secretary ka AITC ha ka 29 tarik u Naiynru, hajrong ini da ong u wa ym kwah u wow klam iwon iwon hajrong i wan u Abhishek Banerjee, tangwa da ong u wa i wym poi u cha kani ka yalang toh neidaw wa em i jia wa sñiawsih ha yung. 

U Himalaya Shangpliang toh u MLA wa da jop na ka Congress, tangwa da psiah u cha ka AITC ryngkat wa ki 11 ngut kiwi ki MLA yong ka Congress ha u snem wa dadep. Katni da mih ka khubor wa ong wa uni u MLA ka Mawsynram ym em de thmu u wow yakhun Election ha u snem 2023 na ka AITC, wei da pyrchang wow thooh da kiwi tawon ki seiñ kam ka UDP wa BJP heiwa da mih leh ka khubor wow yakhun u kam u kyrtong samen.