Ka seiñ JSM Eastern Region ha ka 27 tarik u Naiynru da lai ujor ko ha u Deputy Commissioner, EJH kamjooh cha u Executive Engineer PWD (Roads) NEC Division Khliehriat hajrong i sih u sarok Jalyiah Bypass nadooh Mookhep chadooh Moowakhu wa u sarok Bypass wa pynyabi nadooh Mookhep wa lai lyngba ka Pamrapaithlu PHC hadooh Lad-Sohkymphor Wapung Shnong.
Ka seiñ da ong ko wa kini ki sarok toh kiwa da sih bha wei kiwa da sah khlem chna da slem wei kini lada pynchna ya ki daw pynduna ko yei sahkut kari ha u sarok NH-06 Ladrymbai wa em i yaw wei lada uni u sarok Bypass warim u bha u kam nachwa, ki kari heh (Heavy Vehicle) daw ye ki wow pynemkaam ya uni u sarok yow u mih ha Moowakhu khlem da lai lyngba ka yaw Ladrymbai.
Da sakhi leh neipor cha i por wa i sahkut ki kari khamtam ha Ladrymbai wa em i yaw da ktah bha ya kiwa lai wa wan na u sarok National Highway.
Kamjooh i sih u sarok Bypass wa pynyabi nadooh Mookhep hadooh Lad Sohkymphor Wapung Shnong da ktah ko ya ki paidbah yong kani ka thaaiñ wa lai wa wan lyngba ini u sarok wow lai thooh dawai lai phah sumaar ha Pamrapaithlu PHC neidaw wa uni u sarok da sih wei da ieh khlem pynchna da boon snem.
Heiyatoh wa ini i dawa ka seiñ neiliang u Deputy Commissioner da kular wow chimkhia wei da thoh u leh cha u EE ka PWD (R), EJH.
Neiliang ka seiñ da ong ko wa ym chong klikti ko wei daw booddien ko hadooh wa kut ini i kaam.
