Ynne ka sngi ka Jaiñtia Hills Autonomous District Council (JHADC) Jowai da pynman ko ya ka Dorbar La’yur namo ka Summer Session heiwa da kynmoo warom ya u S. Mulieh uwa jooh man kam u MDC ka JHADC wei kam u MLA warim ka Jowai Constituency.
Kiwa klam ha kani ka sngi kiwa kyntup ya u Andrew Shullai, u CEM ka Council u Thombor Shiwat, u Winning G. Sungoh, u Phasmon Dkhar wa kiwi kiwi da pynsñiaw ki yei dooh wa khroo hajrong i khlaad syndet u S. Mulieh uwa da e i chakri wa pura ya ki paidbah ka ri-loom Jaiñtia.
U S. Mulieh da jooh man u kam u MDC nadooh u snem 1983, 1989, 1994, 1999 wei da jooh man u leh kam u Nominated MDC ha u 2009.
Ha kani ka dorbar u Thombor Shiwat da pyntip u wa da pynku kyrdan ya ki soo ngut ki sahep ka Council kiwa kynthup ya u Johnsing Tariang uwa jooh man kam u Recorder cha u Assistant Land Record & Settlement Officer, u Wanshanlang Songthiang uwa jooh man kam u DCLP School Teacher cha ka kyrdan Assistant Finance & Account Officer, u Jolby Sana uwa jooh man kam u Recorder cha u Assistant Administrative Officer wa ka Dalinkee Suwer kawa man kam ka LD Assistant cha ka Assistant Planning Officer.
Chooh chooh da pynsñiaw u ya ka Election wow jied ya ki Dolloi ka Elaka Shangpung heiwa da jied ya u Chanki Langbang wa ka Elaka Nartiang wa da jied ya u Salong Lamare.
Ha kani ka Dorbar da wanrah leh ya ka Bui u Comptroller and Auditor General of India (CAG) yong u snem 2009, 2010 wa 2011 heiwa da pdiang ya ka wei wow phah ya ka cha u Lat ka jylla.
