Ynne ka sngi ka JHADC da pynman ko ya ka Dorbar La’yur namo ka Summer Session heiwa kani ka dorbar da pyntakha ko ya ki khon ka Niamtre nadooh kiwa kreh ka Council kamjooh leh kiwi tawon neibhah wa ynne man ko ka sngi wa sdang ka lehniam Behdieñkhlam ka Raij Jowai.
Hawa yaklam wa u Chairman ka Council, u Dr. Sankey Shangpung da pynche u deiwa ong, “Deiwa burom ya waroh khamtam ki khon ka Niamtre, i pynman ya kani ka Dorbar ynne ka sngi toh deiwa ya pynbait O kam u Chairman chirup wa ka Secretary wa u CEM wei da leh yeini katkam ki kyndon krehkaam (Rules and Procedures),” deiwa pynrap wa hei sakhiat da mut wow pynman ya ka Dorbar ha ka 14 tarik wei hadien wa tip wa daw em ka Behdieñkhlam da rai wow pynran sngi ya ka ynne ka 11 tarik.
Da ong u leh wa katkam ki kyndon ymtoh u palat soo bnai hapyrdi ki dorbar ka Council wei ki kyndon ong ki wa ymye u hukum (Notify) ya ki MDC (heiyatoh wa ka Dorbar) du hapoh chi bnai.
U Dr. Sankey da ong u wa katkam ka yutip wa da yoh da ong wa ka Behdieñkhlam u sdang ko nadooh ka 14 tarik wei neidaw wa tip wa daw em ka Behdieñkhlam da rai wow pynman noh ya ka ynne ka sng wei ini toh du nei sñiawthooh bakla (Miscommunication) donhi.
Da ong u, “I kam ka Council (JHADC) ymtoh wym burom i ya ki khon ka Raij Jowai, neibhah kam ka Council hi i kaamram yong ka toh wow ri ya ka Riti Dustur ki jaitbru khian paaid wei nei wymtip wei katkam wa man ka Calendar ka Council wa ka yong ka sorkar jylla wa ka Behdieñkhlam u man ko ha ka 14 tarik, tæ pynman i ya ka dorbar ynne ka sngi”.
Heijooh i por da ong u wa i pynman ya ka Dorbar ymtoh wa ym burom ya ki khon ka Niamtre, deiwa kyntu ya ki khon ka Raij Jowai wymtoh u sñiawphær heiyatoh wa ini i kaam deiwa kitbok wei e khublei Behdieñkhlam leh ya waroh.
Heiyatoh wa i pynman ya ka Dorbar da em leh i sñiawkhia na kiwi ki MDC heiwa ha ka Dorbar, u MDC ka liang pyrchah, uwa man leh u MDC ka Jowai Central, u Andrew Shullai da pynsñiaw u yei wym sñiawsuk wa pynman ya ka Dorbar ynne ka sngi.
U MDC ka Musniang Rngad, u Phasmon Dkhar da ong u wa i pynman ya ka Dorbar ynne ka sngi man iwa bakla bha neibhah wa ktah i ya i sñiaw ki khon ka Niamtre heiwa da sdang ka lehniam Behdieñkhlam, deiwa kyntu ya ka Council wa neini chaphrang wow kiar wow pynman ya ka Dorbar ha kam kini ki sngi.
Da kdaw u leh wa em kiwa kreh ka Council kamjooh ki MDC kiwa bood ya kani ka niam wei i pynman Dorbar ynne da ktah bha i yei sñiaw yong ki.
Kiwi ki MDC kiwa da pynsñiaw yei mynsien wa khia hajrong ini i kaam kynthup ki ya u Treilang Suchiang, wa kiwi kiwi heiwa hawa kut ka Dorbar, u Dr. Sankey da kyntu u yei yakrehlang kamjooh leh da kyrpaad u ya ki seiñ niam wow pyntip chwa i por ya ki sngi wa ki tarik wa emkaam khnang wow ye u pynlait na kiwon kiwon ki kaam ka Council.
