Ka Synjuk Waheh Chnong Jowai hapoh i yahkhmat u President u Alan Niangti, u General Secretary u Riquoma Rq. Laloo, u Treasurer u Dame H. Pde wa u Asst. General Secretary u Ryum T. Khonglah da lai yachem ki ya u SP ka West Jaiñtia Hills, u BD Marak ha ka 8 tarik uni u bnai wow yaklam yei eh i khoo ki paidbah heiyatoh wa i sahkut ki kari man ki por hapoh sor Jowai.
Da yaklam leh heiyatoh wa i roi kiwa pynemkaam bakla ya i drugs iwa da pyn sa’ir ya ka imlang sahlang wa da boon ware kiwa tooh wa thiem.
Ha ini i yachem da emlang ka DSP, ka CW Lyngdoh wa u SI ka Jowai Traffic Branch, u R. Umlong, heiwa da yaklam ya tuklar bha ya kini ki mat wa wanrah ka Synjuk.
Neiliang u SP da phah u ya u Umlong wow pynkrehkaam noh da ka rukom pynlai kari wa thymme hadien ka Behdieñkhlam kam wow pyrchang chwa wei lada yoo waman soh man sla tæ wow pynneh yeitæ.
Heiyatoh wa ki bru wa pynemkaam bakla ya i drugs, u SP da ong u wa emkaam wow thoohlaad kammon u yoh kem leh ya kiwa dai, khnang wow ye u pyndoohjait ya i drugs, neibhah dang ha kini ki sngi wa dep da yoh kem ki pulit ya ki arngut kiwa dai drugs. Da khut u ya i yakrehlang ki Waheh Chnong nadooh ki chnong ki thaw yong ki kamjooh ka Jowai hi waroh kawi.
U SP da ong u leh wa emkaam u em i yachemlang waroh ki Waheh Chnong wa ki Secretary chnong khamtam ki VDP chnong kawa man kawi na ki chnat krehkaam hapoh ka chnong wow yarap ya ki pulit.
Neiliang ka Synjuk da kyntu ko ya ki pulit wow leh chitom ya kini ki kaam wa da wanrah ko, neibynta i suk i chngaaiñ ka chnong ka thaw.
