U Sanbor Shullai da ong u wa kamwa da pynsñiaw da kiwa boon ki seiñbhalang ym toh u pynemkaam bakla yei kyntien ‘Jaitbru’, lada em heiwon heiwon leh yei kyntien ‘Jaitbru’ ym toh wow emkaam bakla, khamtam da ki heh spah kiwa thied ya ka Vote yong ki paidbah.
U Sabor Shullai da ong u ya ini ha ka yalang yong ka Federation of Khasi Jaintia and Garo People (FKJGP), kawa da pynman ynne ka 12 tarik ha U Soso Tham Auditorium.
Da ong u wa ki paidbah ym toh de u jied ki ya ki mahajon wow man kam kiwa mihkhmat, tangwa wow jied ya kiwa ye u kreh wei kiwa maya sakhiat ya ka jaitbru, ym ya ki heh spah kiwa pynemkaam bakla ha ka rynsan Election neibhah hei por Election waroh ki Party kiwa maya ‘Jaitbru’ lut, tangwa manda jop won tæ dai ki ya ka jaitbru. Da ong u wa lada man kamni chi kamni daw yachem khaddooh wa u CRP.
U Sanbor uwa man uwa yahkhmat warim ka FKJGP, da ong u wa toh ki khynroo ki wow rah ka khubor wei pynsawa wow beh ya ki heh spah, kiwa mahajon na Jaiñtia, lai thied Vote cha Bhoi wei jop lut, wei ong u wa ki paidbah ym toh de wow yieñ pyrchah du ha Secretariat, tangwa ha u snem wow wan, ya ki heh spah ham chah de tang wow pynman yalang, wei toh u beh.
Da ong u wa hanla man u kam uwa mihkhmat ha ka saiñpyrthai, tangwa i mynsien ym jooh mylliñ ya ka jaitbru wei pynrap u wa embhah wa u Blai da pynkha ya oo ha Laban, wei lada ym toh wa em u Sanbor, ka Laban toh ka General Seat, kawa ki dkhar ye ki wow yieñ wow yaleh ya ka Election, wei khlem poisa da ye u wow pynrem ya uwa choon yong ka jaitbru.
