Ki Ballot Box yow thap Vote neibynta ka Election jied President ka ri India dapoi ko ha Shillong ynnin hadien wa hiar ko ha LGBI Airport, Guwahati wei da booh ya ka ha Strong Room ka Meghalaya Legislative Assembly Building, Shillong deiwa khang tala sbak.
Heiyatoh wa ka Election kawa 16 wow jied President ka ri, neiliang u Montri Rangbah ka jylla, u Conrad K Sangma da pyntip u wa em ki MLA wa em hapoh ka sorkar MDA ki wym thap Vote ha kani ka 18 tarik kawa man kam ka sngi thap Vote wei da pyntip chwa ki.
Ha ka 12 tarik neiliang u Conrad da dep u wow khut ya ka yalang yong waroh kiwa em hapoh ka MDA yow ya tylli u kyrchaan ya ka Draupadi Murmu yow man kam ka President wa thymme ka ri.
Hadien wa pynman ya ka yalang, u Conrad da pyntip u wa em 2-3 ngut ki MLA ki wym thap Vote neidaw wym em ki ha Shillong.
Heiyatoh won yei wym em chah khut ki MLA wa da chah beh na ka Congress cha ka yalang wa wan ka kyrtong President ha Umiam, Ri-Bhoi. U Conrad da ong u wa da dep pynsñiaw u yei sñiawsih yei wym em khut ka BJP ya ki wei kini ki MLA daw chim ki ya ka rai kammon u leh ki.
