Ki heh ka All India Trinamool Congress (AITC) Meghalaya Pradesh kiwa kynthup ya u State President ka party u Charles Pyngrope, u Asst. President, u George B. Lyngdoh, u Dr. Mukul Sangma uwa man leh uwa yahkhmat ya ka Liang Pyrchah ha yung Dorbar Chna Aiñ, ki MDC na Ri-loom Garo wa kiwi tawon kam u Dr. H.H. Mohrmen u kyrtong ka party na 2-Jowai Constituency ynne ka sngi da hiar ki cha Laskeiñ wow pynyaar ya ka chnat krehkaam hapoh ka 4 Mowkaiaw Constituency wei wow pynbna leh ya u Lasting Suchiang kam u kyrtong MLA ka party na kani ka Constituency.
Ya u Lasting Suchiang da pdiang burom da u State President u Charles Pyngrope uwa da kyrpaad leh ya ki paidbah wow kyrchaan pura ya u Lasting khnang wow wanrah u yei kylla.
Neiliang u Lasting Suchiang hawa paan kyrchaan na ki paidbah da ong u wa kani ka kaam toh kawa da angnood u nadooh mynsien heiwow chakri ya ki paidbah ymtoh wa em u deiwi tawon i thmu, neibhah neibynta samen wa ka yung ka sem da biang u neidaw wa da jooh kreh u kam u Lab Technician ha ka chnat sorkar, wei da angnood bha u wow psiah cha ka kaam saiñhima kamtæ da ieh noh u yeini i kreh.
Ha kani ka sngi kiwa klam kynthup ki ya u Dr. H.H. Mohrmen, u George B. Lyngdoh MLA ka Umroi, u Dr. Mukul Sangma wa kiwi kiwi kiwa da khana ya ka yurim ka AITC yieñ ko wow khut ya ki paidbah wow sakhi yei kylla.
U Dr. Mukul da beiñ u ya ka sorkar MDA wa katni neibhah hapoh yong ka da mih chiboon i kulmar wa i wym biang hei rukom krehkaam yong ka iwa da ktah ya ki paidbah nadooh i puræ puthi, i yoh kreh, i roi i paar wa kiwi kiwi.
Heijooh i por da khut u ya ki paidbah wow krehlang neibynta wow yoh yei kylla wei ka AITC daw wan ko heibor hapoh jylla Meghalaya.
