Kiwa kreh ka Emergency Management and Research Institute (EMRI) 108 hapoh ka jylla da rai ki wow sangeh kreh nadooh 4:00 waje i step ka 18 tarik uni u bnai hadien wa ymye ka sorkar wow pyndam ya ka soskular (Contract) wa ka karkhana GVK-EMRI katkam wa da dawa kiwa kreh hapoh ka lama ka Meghalaya EMRI Workers’ Union (MEMRIWU).
Hawa yaklam wa u Wyrta neiliang ka president ka MEMRIWU, ka Microlina Syiemlieh da ong ko wa ka seiñ da rai ko wow sdang yei yakhih iwa khlem booh por nadooh i step 4:00 waje ka 18 tarik, tangwa chong won i katkam wa mih na ka yalang wa da khut u Managing Director (MD) ka National Health Mission (NHM) heipor 9:30 i step yong kani ka jooh ka sngi.
Heiyatoh wa i yakhih ha ka 18 tarik da ong ko wa daw lai bait i yakhih heiwa ym pdiang ki ya kiwon kiwon ki kaam (case) kat hadooh wa kut kani ka yalang.
Chooh chooh da kdaw ko wa ka sorkar waroh chi kattu da ekti ko wow chakri ya ki paidbah cha ki karkhana wa na baar, deiwa kylli leh neiyi i daw wym chimkti ka sorkar ya ini i kaam pyn daka hi bar wow pynlut chawi neibhah ki karkhana daw yaleh ki du wow yoh myntoi ki samen khlem pyrkhat ya kiwa boon walang.
Heijooh i por da ong ko wa lada ym mih soh i yaklam ha ka 18 tarik tæ daw pteiñ bait i yakhih yong ki.
