Ka Meghalaya Assembly Committee on Empowerment of Women (MACEW) ynne ka sngi da phah hajir ko ya kiwa pyllai ya chiboon tylli ki Agency næ ki seiñ kiwa thung kreh chipor ha ka jylla khamtam ha ki chnat ka sorkar pyrdi kiwa kynthup ha NEHU, NEIGRIHMS wa ki yung krehkaam kiwa em ha nongbah Shillong.
Katkam i ong ka Chairperson ka MACEW, ka Dr M Ampareen Lyngdoh, ini i phah hajir ya kiwa pyllai ya kini ki Agency toh hadien wa yoh yutip wa ya i hok kiwa kreh da jooh kyntait ya ki.
Da ong ko wa ka Committee kwah ko wow tip lada ki manbei wa ki kynthai kiwa kreh lyngba kini ki Agency yoh ki yei hok heipor wa pun-khon wei kamjooh leh yoh ki wow chong yung hadooh 6 bnai wow pait wei wow sumaar ya i khonboo, neibhah kamwa sñiaw na kiwa kreh ha NEHU, ha NEIGRIHMS wa kiwa kreh ha kiwi ki thaw wa embynta ki Agency, chisien wa yoh khonboo ym yoh tulop de ki, wei chisien wa pep kreh heipor wa yoh khon ymyoh de ki wow pteiñ ya i kreh.
Chooh chooh da ong ko wa ka Committee kwah ko leh wow tip wa lada em ki laad yarap, kam ka Provident Fund næ kawon kawon ka laad yarap neibhah boonsien ki manbei mar chim chuti ki heipor wa kjut wa chitom leh ym yoh yarap ki.
Ka Ampareen da ong ko wa ha ini i phah hajir ynne ka sngi, neiliang ki Agency da phah ki ya kiwa mihkhmat yong kiwa ymye wow chim ya i rai, wei neiliang ka Committee da khut biang ko ya ki ha ka 8 Naisaphra wow pynche ki hajron ini waroh.
