U Montri wa pait ya ki kaam pohyung ka jylla, u Lahkmen Rymbui da kyntait u yeiwa pynbaad ka BJP wa da pyndik ya kiwa kreh ka Party ha Tura wa ha waroh ka West Garo Hills. Da ong u wa ki sahep ym em hok ki wow pyndik ya kiwa chong chnong wa lui-lui neibhah lada em iwon iwon hap rah da ki sakhi hapoh ka yung kasari.
Kam wow kdaw heini hadien i chah kynreh ka ‘Farmhouse’ yong u MDC ka BJP na Tura, neiliang ka Party ha jylla da pynbaad ki wa pyndik ki pulit ya kiwa kreh ka BJP wei toh i buit saiñpyrthai, wei ha ka sngi nyngkong da pynman ko yei yakhih wa jai-jai wei da yachem ko leh ya u Lat ka jylla hajrong i pynbaad wa chah pyndik kiwa kreh ka Party ha ki bor ka aiñ ha Tura, West Garo Hills District, heiwa neiliang ka Party da dawa ko leh wow beh kreh chipor ya u Deputy Commissioner wa ya u Superintendent of Police neibynta ka takit wa khooid.
Hawa kylli hajrong ini i pynbaad ka BJP, u Lahkmen da ong u wa ym ye wow ong iwon iwon hajrong ini i pynbaad, tangwa da ong u wa sorkar daw chimkhia ko lada em iwon iwon i kaam wa pyrchah aiñ, da ong u wa lada em kawon kawon ka Case næ ka ujor, ki pulit toh u leh ki yeiwa emkaam ymtoh wa mut wow yoh myntoi ka saiñpyrthai.
Da ong u leh wa neiliang u SP ka West Garo Hills leh da pyntip paidbah u neipor cheipor hajrong i lai i kaam, deiwa pynrap wa toh u elaad ya ki wow pyndep ki pulit ya i kaam yong ki.
