Ka sorkar Manipur da phah khang ko ya ka Mobile Internet san sngi ha waroh kawi ka jylla hadien wa mih i kynaad sñiaw yaphær jaitbru hadien wa chah thang kawi ka kari ha Bishnupur District ha ka 6 tarik.
Ha ka 6 tarik kawi ka kari Maruti Eeco da chah thang ko ha ki 3-4 ngut ki khynroo na kawi ka jaitbru ha Phougakchao Ikhai Awang Leikai ha Tiddim Road ka NH02.
Kamtæ da ong wa ye u em ki bru wow chim kabu yeini ki wow pynpoor ya ka khubor thok yow pynchongchit bru deiwa pynemkaam ya ka Internet lyngba u WhatsApp, Facebook wa kiwi kiwi, kamtæ da khang ya waroh ki Mobile Data Service ha waroh kawi ka jylla Manipur hadooh ka 11 tarik lane hadooh wa pynmih hukum da kamwi.
Hapoh ka Bishnupur District da pynkrehkaam da ka Section 144 ka CrPC kawa daw neh ar bnai nadooh ka 6 tarik deiwa khang u yalang palat 5 ngut ki bru, u rah ya ki moo ki dieñ, ki tiar yasiat kiwa ye wow pynmynsoo bru.
Da khang leh wow pynman ya kiwon kiwon ki jait lai paidbah khlem da yoh bor chwa na u District Magistrate.
