U Montri wa pait ya ki kaam pohyung yong ka jylla, u Lahkmen Rymbui da ong u wa ki bor pynlai District wa ka chnat pulit daw leh ki yei kaamram wa emkaam yow pynneh yei suk i saaiñ, wei ini toh i kaamram yong ka sorkar yow man kawa paitbniah.
Ini i klam u Montri toh hadien wa neiliang ka Sur Ka Bri U Hynniewtrep da pynbna ko wow pynman ki jait yakhih waphær waphær kam i dak wow kynmoo ya ka lyngkhooh dap chi snem i khlaad noh uwa yahkhmat warim ka HNLC, u Cherish Starfield Thangkhiew uwa da chah siat yap ha ka 13 tarik Naisaphra u snem wa da dep, wei da dawa leh na ka sorkar wym toh u phah pulit cha Mawlai nadooh ka 12 tarik hadooh 15 tarik.
Hawa kylli ynne ka sngi, u Rymbui da ong u wa ka sorkar daw leh bait ko yeiwa emkaam wei pynsñiaw u yei kyrmen wym em iwon iwon i jia i wow ktah yei suk i saaiñ, khamtam hadien wa u Symbood Montri Rangbah ha ka tayaw wa da dep da pynche u cha katai ka kynhun ya iyi wa emkaam wow leh hajrong ka bui (Report) takit kawa da jia ya u Cherish.
