U Montri Rangbah ka Meghalaya, u Conrad K. Sangma ynne da booh u ya u mooyurim ka Sub-Centre wa thymme ha Chambagre hapoh ka Selsella Block ka West Garo Hills deiwa emlang ki MLA, ka Ferlin Sangma, u Thomas Sangma wa u Marcuise Marak.
U Conrad da ong u wa kani ka Sub-Centre toh kawa man leh kam ka Model Health Sub-Centre wei ha kini ki 3 snem daw chna 300 tylli ki Sub-Centre wa thymme hapoh ka jylla.
U Montri Rangbah da khana u wa da em ka mang poisa kawa T. 165 klur neibynta u chna ya kini ki Health Sub-Centre yow yarap ya ki bru wa em cha jngai wa ki thaw wa man sor yow pynkylla dur yei e yei sumaar sukhær.
Ya kani ka Sub-Centre da chna da kawa ye u yaleh pyrchah yei bor ka rymaw wei kawa pynemkaam leh yei bordiñ wa khooid wei da chna da ka sorkar Meghalaya deiwa ya krehlang waka SELCO Foundation wa Saura Mandala.
U Conrad da ong u wa kini ki Health Centre wa thymme daw man ki katkam ka juk wa katni nadooh i krehkaam wa i rukom pynkrehkaam.
Da khana u leh wa hapoh ka Meghalaya Health Infrastructure Strengthening Project, da booh T. 350 klur yow pynku kyrdan ya ki PHC wa CHC hapoh ka jylla.
Heiyatoh wow pynkhlan ya ki bru wakreh ha ki Health Centre, da pyntip u wa da sdang yei kreh ya ka T. 280 klur PA Sangma Medical Skill Hunar Hub ha Dumindikgre hajan Babadam, West Garo Hills wei kani ka thaw daw pyndap ko yei duna ki bru wakreh ha ki thaw wa cha palatsor kamjooh daw e kreh ko leh ya kiwa boon ki khynroo khyllood.
