Ynne ka sngi, u Deputy Commissioner ka West Jaiñtia Hills District, u Garod LSN Dykes chirup u Roskil Challam, SDO Electrical Division PHE, ki dkhot ka seiñ Khooid Ya Ka Wah Myntdu hei yahkhmat u Khroo Lamsalanki Pariat, President deilang u Alan Niangti, President Synjuk Waheh Chnong Jowai, u DH Pde, President Jaintia Fishing & Environment Protection Association (JF&EPA) wa u C. Laloo, Waheh Chnong Dongmihsngi da pynman biang ki yei li pait li yoo ya ka Pump House kamjooh ya ki thaw pynlang um ka PHE (Electrical) wa em ha ki dong ki chnat waphær wa kynthup ya kawa em ha Khimusniang, Mooliksoo wa ha Dongmihsngi.
Ka thong yong ini i li pait li yoo u Deputy Commissioner toh yow pynsabut yei biang næ ymbiang i rukom pynkhooid pynjngiar ka PHE ya kani ka thaw pynlang um wa em ha Oorkhla chwa wow pynlait ya ka um cha man ki thaw pynlang um yong ka PHE kiwa da chna ha ki dong ki chnat waphær yong ka chnong Jowai.
Neiliang u Deputy Commissioner, u Garod LSN Dykes hadien i yoh u u yoo da ki khmat yei man ki thaw pynlang um ka PHE (Electrical) wa em ha Oorkhla, Khimusniang wei hadien wa dadep pynkhooid ya ki dap u dei hun mynsien wei kyrsu kyntu u leh ya ki bor watoh u pait u yoo yeini i kaam wow chimkhia ki u leh tikna yeini na ki por cha ki por neibynta wow chngaaiñ ki khon ka chnong Jowai wei wow lait ki leh nei tynjooh wei niawliar niawtang hei liang ka umbaam umdih umsait umkhlæiñ.
U Khroo Lamsalanki Pariat, President KYKWM hei yaklam da e u i sñiawngooh wa khroo ya u Deputy Commissioner yei chimkhia yong oo yei ood i naam ka seiñ heiyatoh wei man ka wah Myntdu kam ka wah wa psa umbaam umdih ya ka chnong Jowai.
Ong u leh kam wa ka seiñ yieñ ko ha ka yurim wow yada pynneh pynsah yei man khooid man kyntang ka wah Myntdu kamjooh yei chngaaiñ ki khon ka chnong Jowai kiwa chkeh umbaam umdih na ka PHE, kyrpaad u ya ki bor watoh u pait u yoo ya ka PHE (Electrical) Division wow chimkhia ki leh neini chakhmat u pynmiat pynbha ya waroh ki thaw pynlang um deiwa niamrong wei u thoh leh ya ka sngi wa pynkhooid ya ki neibynta wow tiplang ki paidbah wa chong chnong.
Chooh chooh khutlang u leh ya waroh ki chnat sorkar chirrup ki bru wa chong chnong wow yakrehlang u yada pynneh pynsah yei man ka wah Myntdu dei wow yait nei li noh taroi yei jhep, i jakhlia, ki Plastic wa kiwi kiwi cha ki chariñ lynter ka wah Myntdu khnang wa ki khon pateiñ, ki ksu ki wow wan hadien u yoh ki u yoo u sakhi yei man khooid man kyntang ka wah Myntdu kam ka wah wa dawan da ka hukum Blai wow psa umbaam umdih wei wow kær talawiar ya ka chnong ka thaw neibynta i chngaaiñ wei suk ki khon ka Raij ka chnong.
