U MLA ka Rambrai-Jyrngam, u Kimfa S Marbaniang da ong u wa ka sorkar toh u kynthup lang ko ya waroh kiwa embynta wei wow thung ya ki Regional Committee kiwa rap biang ha i thmu yong ki ar tylli ki sorkar jylla wow yaklam ha ka kylla wa ar heiyatoh wa i pynbait ya u pood u ang.
Ka Langpih kawa haap ha ka kylla wa ar yong i pynbait pood rap chitom wow pynbait wei haap ko ha u pood u ang ka Rambrai-Jyrngam Constituency. Hawa kylli, u MLA da ong u wa nyngkong dooh wow pynbait ya u pood u ang toh wow kynthup lang ya ki yutip na ki Sordar, ki Rangbah Shnong wa kamjooh ki Hima deiwa pynsñiawthooh bha ya ki.
U Kimfa da ong u wa hadien wa da yoo yei duna ha ka kylla wa nyngkong, ha kani ka kylla wa ar ymtoh wow leh jhan, da toh wow syndong khamtam wa em ki thaw wa chitom wow pynbait kam ka Langpih, ka Block-I wa Block-II.
Hawa kylli won na u MDC ka Rambrai, u Bajop Pyngrope da yaroh u ya ki ar sorkar kiwa da sdang wow yaklam neibynta wow pynbait ya u pood u ang. Da kyntu u leh ya kiwa chong chnong kamjooh kiwa synchaar chnong wa ki seiñbhalang wow yakrehlang wa ka sorkar wow ye wow pynbait chisiendon ya i kajia pood.
