Dawa ka JSU wa ka Synjuk Waheh Chnong wow sdang noh ya ka B.Ed College ha Jowai

Ka Jaiñtia Students Union deilang wa ka Synjuk ki Waheh Chnong Jowai da lai yachem ki wa u Montri ka chnat Puræ Puthi ka sorkar Meghalaya, u Lahkmen Rymbui ha ka 29 tarik wow dawa u sdang noh ya ka B.Ed College ha Jowai kawa da sah khlem sdang nadooh u 2016 neidaw wym pu yoh yei tipmit na ka National Council of Teachers Education (NCTE).

Neiliang u Montri da khana u wa ka sorkar dang pyrchang ko wow pynbiang yeiwa emkaam yow yoh yei tipmit wow sdang ya ka B.Ed Integrated College kawa 4 snem i e sikai ha Kiang Nangbah Govt. College kawa man kam kawi na ki Pilot Project napyrdi ki B.Ed Integrated College yow sdang neibynta ka samoi 2022-23 hapoh ka ri India katkam ka New Education Policy (NEP) 2020.

Katkam ki kyndon ka NEP 2020, i pynkylla ha ka B.Ed Course ym chah de wow sdang thymme ya ki B.Ed College kiwa e hikai ya ki B.Ed Course wa 2 snem kamwa da leh nachwa. U Montri da khana u leh wa neibynta u snem puræ 2022-23, ka Governing Body ka NCTE ym pu ye ko wow chong yalang wei da rah ya kani ka yalang cha ki bnai wow wan wei na itæ i daw ym pu ye u chim yei rai wow tipmit ya ka B.Ed Integrated Course ha Kiang Nangbah Govt. College wa em ha Jowai.

Ka JSU wa ka synjuk da e ki leh dei thoh cha u Montri Rangbah ka Meghalaya wa cha u Member Secretary wei leh cha u Chairperson ka NCTE wa ha kani ka kynti wow tipmit wei wow e bor yow sdang noh ya ka kani ka B.Ed Integrated Course neibhah ka B.Ed College toh kawa da thrang wei da dawa ha Ri-loom Jaiñtia kawa da slem bha nadooh u 1987 wa da sdang dawa ka JSU wei leh hawa booh yurim leh ya ka B.Ed Govt. College ha Mynthong, Jowai nadooh u snem 2012.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha iwi won i liang, ka JSU wa ka synjuk da kyrpaad ki leh na u Montri wow tympra noh ya ka Girls’ Hostel ka Govt. Girls’ Higher Secondary School kawa em ha Mynthong, Jowai neibhah da ieh tyngkreng ya ka nadooh u snem 2017 neidaw wa kani ka yung da man ko ka wym biang de u pynemkaam. Da dawa leh wow chna noh da kawa thymme neibhah kani toh kawa emkaam khamtam ya ki khynnah skur wa wan na ki thaaiñ palatsor wei leh kiwa duna hei yoh i kot.