Ki dkhot ka JSU hadien wa da yoh yutip wa ki paidbah chem chitom ki hei lai i wan neidaw wa oor khyndaw wei u moo wa heh da neh u da kiwa boon bnai hajan ka chnong Borghat khlem da chimkhia kiwa kreh sarok nadooh u Mahahral yong ka thaaiñ.
Ka seiñ da ong ko wa ini i oor moo da pynwit i yei lai i wan kiwa chong chnong khamtam ka khayi pateiñ ka thaaiñ wa em cha khappood neidaw wa ki kari khian wa ki kari heh ym lait ki wow lai wei da man leh i maa wow lai u wan na ini i bynta wa oor heiwa wot hadien wa da dep wow pyntip wei kyrpaad ya ka chnat PWD wow chimkhia u pynkhooid yeini tangwa ym em da leh iyi iyi.
Kamtæ ki dkhot ka JSU Southern Border Zone da lai ki wow pynkhooid wei tympiah ya uni u moo deiwa tympdung wei wow pynchna katwa ye khang wa ki paidbah ka thaaiñ u yohlaad ki wow lai u wan khlem da em i thut.
Neiliang ka seiñ da maham ko wa neini chakhmat wa ka chnat PWD toh u chimkhia ko yei eh ki paidbah khlem da boohteiñ.
