Kiwa synchaar yong ki 36 tylli ki chnong kiwa haap hapoh ka Block-I ynne ka sngi da yachem ki ya u Symbood Montri Rangbah ka jylla, u Prestone Tynsong yow pyntikna wa kitai ki chnong em ki ha ka jylla Meghalaya, wei ym mih de ki kynrum kynram hawa pynbait pood yong ka kylla wa ar hapyrdi ka Meghalaya wa Assam.
Hawa klam cha ki laad pathai khubor, u Secretary ka Langbang-Nongphyllut-Pangam-Raliang Council, u Marcus M Thaïang da ong uwa ka Block-I toh kawa em hapoh yong ka Elaka Langbang-Nongphyllut-Pangam-Raliang Dolloiship wei haap ko hapoh yong ka Meghalaya.
Da ong u wa kiwa synchaar yong ki 36 tylli ki chnong da pynsñiaw ki hakhmat ka sorkar wa ha ini i pynbait pood yong ka kylla wa ar ym toh de wow mih ka kynrum kynram kamwa da jia ha ka kylla wa nyngkong. Da ong leh wa neiliang kiwa synchaar chnong daw pynsñiaw ki yeini i kwah yong ki hakhmat u Montri Rangbah ka jylla ha ka 8 tarik uni u bnai.
Da ong u wa neiliang kiwa synchaar chnong kwah ki leh wa ki 36 tylli ki chnong u haap ki chapoh ka jylla Meghalaya, wei da pynrap wa ka sorkar ym toh u leh ko samen wei wow leh mylliñ ya kiwa kitkaam chnong, wei chwa u sdang i yaklam toh wow ya syllok wei wow sñiawthooh yumut. Da ong u wa ka sorkar ha ini i pynbait ya u pood toh leh u chim yei rukom im yong ki bru ha ka thaaiñ nadooh ka riti ka dustur, ka ktien ka thylliej neibhah ha Block-I wa awjan waroh kiwa chong chnong toh ki Pnar.
U Thaïang da khana u wa i yachem wa u Symbood Montri Rangbah man ko kawa sñiawsuk, wei pyntip u wa neiliang u Prestone da chimkhia u yei ood i naam kiwa synchaar chnong. Da khana u leh wa neiliang kiwa yahkhmat chnong da pynbiang ki ya ki kot ki sla hawa yatoh wa i thaw ha Block-I ya kawa daw wai hawa yachem ki ar ngut ki Montri Rangbah.
Hawa yaklam wa u Commingson Dkhar uwa man u Chairman ka Langbang-Nongphyllut-Pangam-Raliang Area Committee, da ong u wa katkam man kattæ kiwa chong chnong kiwa man kam ki Pnar du ha Langbang-Nongphyllut da em ki hadooh kamwa 13,000 ngut, katwa kiwi ki jaitbru ye ki wow em kamwa 3000-4000 ngut.
