U Montri Rangbah ka jylla, u Conrad Sangma ynne da wai u ya ka Website yong ka Meghalaya Residents Safety and Security Act (MRSSA) deiwa emlang u Montri ki Kaam Pohyung, u Lahkmen Rymbui, u MLA ka Mawsynram,u H.M. Shangpliang, u Chief Secretary ka jylla, u D.P. Wahlang, u DGP, L.R. Bishnoi, ka DC East Khasi Hills, ka I. Laloo, u SIO ka NIC, u Timothy Dkhar, ki sahep sorkar, wa ki waheh dong.
Kani ka Website toh neibynta ki 7 tylli ki dong wa em ha Shillong kam chibynta wow sdang nyngkong wei daw pynemkaam ha Nongrim Hills, Lapalang, Nongmynsong, Nongrah, Pohkseh, Riat Laban wa Wahdienglieng.
Neiliang u Conrad hawa e yei klam da ong u wa da kani ka rukom ka juk wa katni namo ka Digital Age daw pyntikna ko yei man chngaaiñ kiwa chong chnong wei man ko leh kam chibynta wow pynlang pynlum yutip yow suk u booddien ya kiwa wan sah ha ka chnong wei daw pynsuk leh ya ka sorkar wow pynkrehkaam ko ya ki kaam yong ka.
Da khana u leh wa lyngba kani ka Online System daw pynyabi ya palat 6000 tylli ki chnong wei hadien wa da pynlum pynlang ya waroh daw ye wow e yarap wei chakri wa paka kam hei e sumaar kamjooh leh wow pait yei rukom pynkrehkaam ya ki Scheme sorkar.
Neiliang u Lahkmen Rymbui da klam u yei emkaam i man chngaaiñ ki paidbah wei yei emkaam ya ka chnong ka thaw wow chimkhia ki yow yada ya jar jiar kiwa chong chnong.
Ka sorkar Meghalaya da wanrah ko ya ka Meghalaya Resident Safety & Security Act 2016 dei thmu wow yada wei yow man chngaaiñ kiwa chong chnong ka jylla yow lait kiwa kwah wow pynthut yei suk i saaiñ u yoh thaw sah thaw rieh wei kamjooh yow pait yei em kiwa wan sah wan psiah pyrchah ya ka aiñ chapoh ka jylla, wei lyngba kani ki tre yung kamjooh kiwa chongwai ye ki wow pyntipmit namo wow Register wa ki bor sorkar.
Ye wow lai cha kani ka website ha http://megrssa.nic.in wei dang chna leh ya ka Mobile App neibynta kani.
