Ka Community Institute of Technology (CIT) Amlarem Centre deiwa kyrchaan ka Meghalaya State Skills Development Society ka sorkar Meghalaya, ynne ka sngi da pynman ki ya ka yalang pynsñiawthooh paidbah namo ka Awareness Programme cum Mobilisation Drive hapoh ka chnong Padu Bah neibynta wow pynche hajrong ki jait e sikai waphær waphær kiwa da kyrchaan da ka Meghalaya State Skill Development Society lyngba ka Skills Meghalaya.
Ha kani ka sngi da yoh i klam na u Skill Development Officer, MSSDS, u Lambormi Suchen, uwa da klam pynche chaphang ka Skills Meghalaya Project yong ka sorkar Meghalaya wow e ya ki jait sikai kiwa ye u yoh lyngba ka Skills Meghalaya Programme kiwa man neibynta ki khynnah khynroo kiwa em yei thmu wow seiñ khih yong idæ manda dep ki wow pynbniah ya idæ lyngba ki Skill Training.
Da pynchngaaiñ deiwa emlang u waheh chnong ka Padu Bah, u Neta Pohthmi uwa da e yei klam wow kyntu ya ki khynnah khynroo kynthai wa chynrang wow wan chakhmat neibynta wow chim kabu hawa ka sorkar da wanrah ko chadooh ki chnong wa ki thaaiñ yong ka Amlarem hawa yatoh wa ki jait sikai waphær waphær.
Chooh chooh da yoh i pynbna da ki bru ka CIT ya ka e sikai wa e ki kam ka soor that (Tailoring) hapoh ka Amlarem Centre khlem da hap u su kawa pynman 3 bnai wei ya ka e sikai da pynman nadooh ka Monday hadooh Friday nadooh 9:00 waje i step hadooh 4:00 waje noh chariñ ka sngi.
Ha kani ka sngi ki paidbah khamtam ki manbei da ya wan ki wow chimbynta chitrhem cha kani ka yalang wei da ya phyllu yumut ki leh heiyatoh wa ki jait e sikai kiwa ye u pynyoh kaam yoh jaam. Da pynpsiah leh yei pyrtuid kiwa em yei thmu wei thrang wow yoh sikai hei soor thay hapoh ka CIT Amlarem Centre.
