U Symbood Montri Rangbah ka jylla, u Prestone Tynsong ynne hapoh ka Yung Dorbar Chna Aiñ da ong u wa ka sorkar ym em thmu ko u kyrriah ya kiwa chongdai madan lada ym ye u e thaw chwa ya ki cha wi wow chongdai ki.
Yeini da ong u Prestone hawa jubab yeiwa kylli u MLA ka Mawlai, u PT Sawkmie heiwa u Prestone da ong u wa waroh iwa da leh ka sorkar toh yow lait kiwa chongdai madan wow chong hei thaw wa thut i lai i wan ki kari wa ki bru paidbah kamjooh yow lait nei maa ya waroh hi.
Da ong u wa ini waroh ym toh wa yoobeiñ ya kiwa chongdai tangwa yow pynkrehkaam ya ka aiñ Street Vendors (Protection of Livelihood and Regulation of Street Vending) Act, 2014 ka sorkar India.
Da khana u wa hapoh kani ka aiñ da hap wow tipmit yei pyrtuid kiwa chongdai, u pynbna yei thaw chongdai, u chna ya ki Town Vending Committees, ki laad ujor wa kiwi kiwi. Wei yow leh yeini ka sorkar da pynbna ko leh ya ka Meghalaya Street Vendors (Protection of Livelihood Regulation of Street Vending) Rules, 2022.
Da em leh 1249 ngut kiwa chongdai kiwa da dep wow tipmit (Register) ha ki 6 chnong Municipal ka jylla. Wei na kini 342 ngut toh kiwa chongdai ha Shillong.
Da ong u leh wa ini wa dep da e por 10 sngi da ka DC ka East Khasi Hills wow pyndep ya ini.
Da ban joor u wa ini waroh ym toh wow pyndik ya kiwa chongdai madan tangwa yow pynkyllooid ya ki luti lai kjat.
