U Chief Engineer ka Public Works Department (Roads) ha ka 13 tarik uni u bnai da pynmih u ya ka Online Tender wow chna ya ki bynta wa da sih kamjooh wow siang psiang ya u sarok Rymbai-Bataw-Borghat-Jalalpur Road uwa em ha khappood wa ka Bangladesh ha East Jaiñtia Hills.
Da e por hadooh ka 12-10-22 ya kiwa kwah u kreh ya uni u sarok wow pyndap ya iwa emkaam wei wow leh ya ka Online Bidding.
Da mang wow pynlut hadooh T. 24.160 klur neibynta ini i kreh lyngba ka Central Road Infrastructure Fund (CRIF) yow chna 30 Km uni u sarok.
Ki chnong wow myntoi na i kreh ya uni u sarok kynthup ki ya ka Rymbai, Umsatai, Ladwah Wapung, Deiñsatlang, Pynurkba, Bataw, Umlynsha, Lakadong Umlatdoh, Lama, Natbor, Borghat, Pdeiñwahkhynriaw, Demlakadong, Kwator, Hingaria wa kiwi kiwi.
I chna ya uni u sarok daw myntoi bha i ya ki paidbah khamtam heipor wa em hei kjut i chitom kamjooh leh hei lai i wan neidaw wa da joor sih uni u sarok.
