Ka JSU kam chibynta i lai luti cha u moomer i dap 50 snem ka seiñ da pynman ko chiboon ki yalang, ki yalehke Sports wa kiwi kiwi wow lehkmen i wow kut ha ka 18 Kmaichonglad 2022.
Ka JSU lyngba ka Khliehriat Circle ynne ka sngi chirup wa ka yung krehkaam u DC wa SP ka East Jaiñtia Hills da pynman ki yei pynsñiawthooh ya ki khynnah skur ka thaaiñ East Jaiñtia ha St. Anthony’s College Byndihati hajrong i sih wa mih na i pynemkaam bakla ya i drugs.
Ya ka yalang pynsñiawthooh da pynlai da u General Secretary ka seiñ, u Treibor R Suchen heiwa da yoh i klam lamkhmat na u President, u Livinson Sama wei da yoh i klam na ka F. Wann kawa man ka EAC ka District wa na u S. Thamar na Khliehriat Police Station wei da yoh i klam pdiang burom na u Fr. George Lyngkhoi uwa man u Principal ka St. Anthony’s College, i klam na u President ka seiñbei u Jersom Shylla wa i klam e khublei na u President ka South Border Zone u Ajoyminson Lyngdoh.
Ka pynsñiawthooh ynne da man ko hajrong ka phang “A Drug Free Society” heiwa da em ar ngut ki bru chemphang, ka Rinibeth Patlong, Program Manager MCSWA TI CC Khliehriat na ka Mihmyntdu Community Social Welfare Association (MCSWA) wa na u Heibor Pariat uwa kreh warim ka Voluntary Health Association Meghalaya (VHAM).
Ka JSU da pyntip ko leh wa daw pynman chooh ko ya ki yalang wa har rukom ha kylleiñ ka Ri-loom Jaiñtia wow khoom u kdoh yei pynemkaam bakla ya i drugs.
